Suliassaqarfiit 13-it kommuninut nuunneqassapput

Suliassaqarfiit kommuninut nuunneqartussat pillugit suliaq ingerlajuarsinnarpoq. Allaffissornikkut Ataqatigiissaarisut suliassanik nuussiniarneq pillugu suliaqarnermi killiffik pillugu nalunaarusiamik Politikkikkut Ataqatigiissaarisunut tunniussipput. KANUKOKA'p pisortaa Martha Labansen ima oqarpoq:

- Suliassaqarfiit siulliit pisariinnerusumik tunniunneqarsinnaasutut taaneqarsinnaasut, illuatungeriit, tassa Namminersorlutik Oqartussat taavalu kommunit isumaqatigiissutigisaat nuunneqarsinnaasut, taakku siulliutillugit piareersaqquneqarput, politikerinit juunip aallartinnerani nalilerneqarsinnaaniassammata. Suliassaqarfiit 13-iusut iluanni suut piareersagassaassanersut qulaajaqqaartussaavarput, ilaatigut inatsisiliortoqaqqaartariaqassagami, Kanukokap pisortaa Martha Labansen oqarpoq.

Suliassaqarfiit ataasiakkaat allanut naleqqiullugit pisariinnerusumik nuunneqarsinnaapput, ulluinnarni allaffissornikkut aningaasatigullu pisariaqartitat eqqarsaatigalugit nuukkuminarnerusutut nalilerneqarsinnaallutik.

Martha Labansen nassuiaavoq:

- Meeqqat angerlarsimaffii assersuutigisinnaavavut. Taakkua nuunneqasssagunik inatsisiliorfigineqaqqaartariaqassapput, taamaattumillu nuunneqartussani siulliunneqarnaviarunarnatik. Imerajuttunilli katsorsaasarnermut tunngatillugu piareersaasunik sulisoqalereerpoq, sumullu killinnersut tassani apeqqutaassaaq, Kanukokap pisortaa Martha Labansen oqarpoq.