Suliaritissimasoq kommunimit tupermik tunisittoq
Qaratsamigut uummatimigullu aanaartoornermi kingorna napparsimavissuarmiit angerlartinneqareernermi kingorna tupermi najugaqarsimavoq.
Angut nammineerluni nunaqarfimminut angerlarusussimanngimmat Kommuneqarfik Sermersuumiit tupermik tunisissimavoq.
Tupeq qasertoq, tungujortumik ulissualik. Angutip Napparsimavissuarmiit angerlartinneqareernermi kingorna angerlarsimaffigaa.
Angut pineqartoq kinaassutsiminik isertuusserusuppoq. KNR-mullu oqaluttuarpoq, nunaqarfimminut uteqqikkusunnani aqqullummat, portujaamilu najugaqarluni. Taamaattoq pitsorlukkami rollatoremillu pisuuteqarluni nunaqarfimminut uterusussimanngilaq. Rollatori aanaartoornermi kingorna pitsorlulerami atortorilerpaa.
Kommunip angerlarsimaffeqanngitsut unnuisarfiannut kingorna innersuuppaa:
- Kisianni imerajuttuugama imminullu katsorsarlunga, tusartarakkuli taakaniittartut kamaattartut aalakoorlutillu najugaqarfimmiittarlutik, angerlarsimaffeqanngitsut najugaaniikkusussimanngilanga, angut kinaassutsiminik isertuusserusuttoq KNR-mut oqarpoq.
Inissaminik noqqaareernermi kingorna, Kommuneqarfimmiit initaarnissami tungaanut inigisassaminik tupermik tunisippoq. Inissaqannginnamili akueraa, tassaniillunilu aappassaanik napparsimavimmut unitsitaanissami tungaanut.
Tamatigoortuua angerlarsimaffeqanngitsunut tupermik tunniussisarneq?
- Naamik soorunami taamaasiorneq ajorpugut, Kommuneqarfik Sermersuumi Tungiuinermi pisortaq Aaja Chemnitz Larsen oqarpoq.
- Pineqartut nalilersortarpagut isumaginninnikkut inissiami najugaqalersinnaanersut, amerlanerpaatigullu angerlarsimaffeqanngitsut unnuisarfianut innersuussisarpugut.
Kisianni angut kommunemiit tupermik najugarigallagassaanik tunineqarsimasoq. Arlaannillu peqquteqarsimassaaq ilissinniit tupermik tunineqarmat?
- Aap, inuit ataasiakkaat pillugit oqaaseqarsinnaatitaanngilanga. Kisiannili ajuusaarutigaara taamatut pisoqarsimanera, aamma angutip nammineerluni tupeq qinnutigisimaneraa ilisimanngilara, oqaaseqarfigisinnaanagulu, Aaja Chemnitz Larsen oqarpoq.
Angut ulluni qaninnerni napparsimavissuarmiit angerlartinneqassaaq. Isumaginninnikkut inissiataarnissani neriuutigaa. Kisiannili taamaanngippat tupeq isumalluutigisinnaavaa.
