Sanami eqqiaasut soraarsitaasut: Suliap annersaa suliffeqarfimmit avataaneersumit isumagineqalissasoq

Dronning Ingridip Napparsimmavissuani Nuummiittumi eqqiaasut maajip 29-anni soraarsitaapput. 

Eqqiagassat suliffeqarfimmit avataaneersumit isumagineqalernissaat, soraarsitaasunut tunngavilersuutaavoq. 

Peqqinnissamut naalakkersuisoq pisumik maanna misissuisitsivoq. 

Laura Frederiksen suleqataalu arfineq marluk soraarsitaallutik mailikkut maajip 21-anni nalunaarfigineqarpoq. Tassalu soraarsitaanerminnut allakkamut akinissaminnut sapaatit akunnerinnaanni periarfissinneqarput. 

Laura Frederiksenip mailikkut allagarsiaa KNR-imiit takuarput. 

Allakkat pillugit sulisitsisut sinniisaannik ataatsimeeqateqarsimanatik taanna oqaluttuarpoq. 

- Naamik taakkua tassa kisimik nassiuppaat, ataatsimiileratta peqataasoqanngilaq sulisitsisunit ataasinnguamilluunniit. 

Aamma sooq soraarsitaanerlutik tunngavilersuutinik nassuiaaffigineqarsimanngillat. 

- Sooq soraarsitaanersugut allagarsianni tunngavilersorneqanngillat, allat soraarsitaanermi patsisaasunut tunngavilersorneqarput, uagut sulisut marluk soraarsitaasuni tunngavilersuutitaqanngillat, 

Kikkut soraarsitaanissaannik toqqaanermi ilinniagaqassutsikkut piginnaasat, aamma sulianik ingerlatsinermi naammassisinnaasat taakkulu pitsaassusaat, Peqqinnissaqarfiup ilaatigut tunngavilersuutigigai allakkami ersippoq. 

Napparsimasunut toqqaannartumik attuumassutillit eqqiarnissaat Peqqinnissaqarfiup nammineq pisarnertut isumagissagai aamma allassimavoq.

KNR-ip Sanami aqutsisut oqaaseqarnissaannik periarfissillugit saaffigai, tassanngaanniilli suli akisoqanngilaq. 

Naalakkersuisoq misissuisitsisoq

Aamma peqqinnissamut naalakkersuisoq Anna Wangenheim attaveqarfigaa, taannali pisut pillugit misissuisoqartilluni oqaaseqarsinnaanani allaffimmineersumik akititsivoq. 

Soraarsitsinerli pillugu Facebookimi tallimanngornerup ullaani ilaatigut ima allappoq.

- Naqissuseqqaarlara Naalakkersuisut sinnerlugittaaq, nunaqavissut sulilluartut ineriartortitsinissamut isiginnaartuuinnaassanngimmata. 

- Taamaattumik politikkerinngilarput sulisinnaasunik sulisinnaajunnaarsaanissaq - killormuuanik pisariaqarpoq inerisaaqataanissamut akisussaaqataatinneqarnissaat. 

Nangipporlu: 

- Oqaluttuat ingerlaartut aallaavigisaanik qullersanut allaganngorlugu nassuiaasioqqusivunga. Naatsorsuutigilluinnarpara suussusersisoqassasoq. Aamma malitassat malinneqarnissaat soorunami naatsorsuutigalugillu piumasarissavara.