Suli sapaatip-akunneri marluk-pingasut

TV-kkut digitalimik isiginnaarniarluni dekoderi siornali tunissutissaagaluaq sapaatip akunneri marluk pingasulluunniit qaangiuppata agguaanneqarsinnaassaaq.

Dekoderit Nuummut apuutereertut INI A/S-imi pisortaq Allan Werge oqarpoq, maanngaanniillu timmisartumik umiarsuarmillu sinerissamut nassiussorneqalerlutik. Illoqarfiit ukiup ingerlanerani aatsaat digitalimik isiginnaarsinnaalertussat, tassa Uummannamiit avannarpasinnerusumiittut Tunumilu illoqarfiit ilanngullugit nassiussuiffigineqalerput.

Dekoderit illoqarfinnut tamanut apuutereerpata sumut aaneqarsinnaassanersut nalunaarutigineqarumaarpoq.

Maannakkut aamma dekoderip qanoq atorneqarnissaanut ilitsersuut kalaallisut qallunaatullu allanneqarpoq.

Dekoderit A/S INI-p 1,7 miliuunit koruunilersimavai poortorneri nassiussornerilu aamma aningaasartuuteqarfigissallugit. HD-TV digitalimik isiginnaarsinnaaneq novembarilli 28-anni ajornarunnaarpoq.