Suleqatissamik nalunaaruteqannginneq pissutaasinnaasoraat
- Suleqatissamik tikkuaasimannginnerput malugisinnaavarput. Aalajangersimasumik suleqatissatut piukkussagut tikkuanngilagut, tamannalu aporfiusinnaasimassaaq, kisianni partiip iluani tamakku nalilersorneqarumaarput, tullissaanullu qanoq iliussanerluta eqqarsaatigilluarumaarparput, Demokraatit siulittaasuat Jens B. Frederiksen oqarpoq.
Folketingimut 2007-imi qinersisoqarmat Demokraatit 18,3 procentinit qinerneqarput, ukioq mannalu 12,6 procentinit qinerneqarlutik. Inatsisartunulli 2009-mi qinersisoqarmat Demokraatit 12,7 procentinit qinerneqarmata Demokraatit qinersisaat allannguuteqarpallaarsimanngitsutut, Jens B. Frederiksenip nalilerpaa:
- Inatsisartunut 2009-mi qinersimnermut sanilliullugu kinguarianngilagut. Qinersisartugut nikinngillat. Nuummi 20procentit missaanniipput, Kalaallit Nunaallu tamakkerlugu ataatsimut isigalugu 12 procentit missaanniillutik. Taamaammat qinersisigut ikileriarsimanngitsutut isigivarput, Jens B. Frederiksen oqarpoq.
Partiillu assigiinngitsut Inatsisartunut kingullermi qinersisoqarmat qinersisaat qiviassagaanni partiit tamarmik maanna allannguuteqarpiarsimannginnerat Demokraatinut isumalluartitsivoq:
- Ukioq manna qinersinerup tamaat isigissagaanni, partiit qinersisaat ukiunut allanut naleqqiullugit allannguuteqarpallaanngillat. Taamaammat Demokraatit ingerlaqqinniissaannut tunngavissaqarluarpoq, Demokraatit siulittaasuat Jens B. Frederiksen oqarpoq.
