Theresa May illuatungiliuttunut: Suleqatigiittariaqarpugut

Nammineq soqutigisat illikarteriarlugit Tuluit Nunaata EU-mit aninissaa pillugu aaqqiissutissarsinissamut piffissanngorpoq.

Tuluit premierministeriat Theresa May, tuluit inatsisartuini tatiginnikkunnaarnermik taasititsisoqarnera anigoreerlugu pingasunngormat unnukkut taama oqarpoq.

- Brexitip ingerlateqqinneqarnissaa inuiaat tuluit kissaatigaat. EU-mut isumaqatigiissutissaq tuluit inatsisartuini - amerlanerussuteqarluartunit - itigartitsissutigineqarpoq.

- Inatsisartut sorusunnginnerlutik maanna oqaatigereerpaat. Taava sorusunnersut paasiniarlugu maanna suleqatigiittariaqalerpugut, Theresa May oqarpoq.

AAMMA ATUARUK Mayip naalakkersuisuilu tatiginnikkunnaarnermik taasineq anigorpaat

Partiit illuatungiliuttut annersaata Labourip isumaqatigiinniarumannginnera taassuma pakatsissutigaa.
Mayip oqaatigaa partiit illuatungiliuttut allat pingasut pingasunngornermi oqaloqatigereersimallugit.

- Labourip siuttuata isumaqatigiinniarumannginnera pakatsissutigaara, matorpulli ammatipparparput, Theresa May, Jeremy Corbyn saaffigalugu taama oqarpoq.

EU-mit avissaarnissamik isumaqatigiissut Theresa Mayip ukioq kingulleq isumaqatigiinniutigisaa tuluit inatsisartuinit marlunngormat unnukkut itigartitsissutigineqarpoq.
/ritzau/