Suleqatigiit angalasut nalunaaqutsersuissapput
Illoqarfiit suleqatigiit angalasunit pisummit aqqutinik sapaatip akunnerini tullerni sisamani nalunaarsuiffigineqartussat tassaapput Qasigiannguit, Qeqertarsuaq Uummannarlu.
Kommunip Destination Avannaatalu ukioq manna kissaatigaat illoqarfinni pingasuni pineqartuni pisummik aqqutinik nalunaaqqutsersuinissaq.
- Illoqarfiit taakkua pinngortitamik kusanartumik pisuffissaqqissumillu avatangiiseqarput, takornariaqarnikkullu periarfissarissaarluarlutik. Kommuni illoqarfinni pingasuni tamani suleqatissaminik attaveqareerpoq. Illoqarfinniit aallarluni ulloq ataaseq pisuffissat nalunaaqqutsersorneqassapput, ulluni arlalinni pisuffissat pinnagit, Qaasuitsup Kommunia taama nalunaaruteqarpoq.
Ilulissat eqqaanni pisummik angalaarfissat ukiuni kingullerni tallimani Mellemfolkelig Samvirkemit ikiortigalugu pitsanngorsarneqarsimapput. Ukiormanna sulineq kommunip nammineq isumagaa.
Suleqatigiit angalatinneqartussat tassaapput kommunimi sulisut marluk, ilinniartut marluk namminnerlu piumassutsiminnik peqataasut marluk.
