Suleqatigiissitsisut: Isumaginninnermi pissutsit pitsanngorsarnissaat siuttuuffigissavarput
Kikkut qanoq iliuuseqarnissaat pillugu, sumillu ikiortariaqarnermut sapaatit akunnerini kingullerni oqallinneq unittariaqarpoq.
Kommuneqarfik Sermersuumi meeqqanut atuarfeqarnermullu ataatsimiititaliami siulittaasunngortoq, Suleqatigiissitsisuneersoq, Michael Rosing taama isumaqarpoq.
- Maanna iliuuseqassaagut. Maanna imaaliussaagut. Taava naalakkersuisut malinnikkusukkunik malinnissapput. Uagulli suliassaraarput taamaaliussaagullu, Michael Rosing oqarpoq.
Kommuni avataanit aqunneqalissanersoq utaqqisaasoq
Kommuneqarfik Sermersuumi isumaginninnikkut susassaqarfik avataanit aqunneqalissanersoq piffissami matumani oqallisaasoq Michael Rosingip ilisimalluarpaa. Tamanna kommunalbestyrelsip siuttuuniarneranut pilersaarutaanut soorunami akerliusoq siulittaasup nassuerutigaa.
- Suleqatigiinniarneq ingerlalluanngilaq. Naalakkersuisut kommunip avataaniit aqunneqarnissaa kissaatigigunikku taamaaliussapput. Kisianni tamanna akisussaaffigissavaat, naluara taama akisussaaffeqalerusunnersut, Michael Rosing oqarpoq.
AAMMA ATUARUK Sermersuup borgmesterertaavanut apeqqutit arfinillit
Taamaattoqarsinnaavorlu. Naalakkersuisut aallartitsinissamik pilersaaruteqanngitsut Danmarkimiillu ikiorneqarnissamut suli piareersimanngitsut, isumaginninnermut naalakkersuisup, Martha Abelsenip (S) tusagassiortunik katersortitsinermi pingasunngornermi ilisimatitsissutigaa. Matumani Tasiilami pissutsinik pitsanngorsaanissamut suut pisariaqartinneqarnersut naalakkersuisunit ilisimaneqannginnerat pissutaavoq. Tamanna kommunip akisussaaffigigaa isumaginninnermut naalakkersuisoq isumaqarpoq. Tamannalu pillugu isumaqatigiipput.
Kommunalbestyrelsi allattorsimaffiliorniartoq
- Kommuni qaninnerpaavoq, annertussusiliinissarlu kommunip suliassaraa. Taamaammat soorunami kommunip sorpiaat pisariaqartinneqarnersut nalunaarutigisussaavaa. Tamannalu sulissutiginiarparput, Michael Rosing oqarpoq.
Nuna tamakkerlugu iliuusissat pillugit pilersaarummik ukiaru saqqummiunneqartussamik suliaqartoqarnissaa, Martha Abelsenip tusagassiortunik katersortitsinermi oqaatigaa. Tamanna Inatsisartut Naalakkersuisunut siorna ukiakkut ataatsimiinnermi peqqussutigaat.
