Suleqatigiilernerup kalaallit inuussutissarsiornerat nukittorsassavaa
Taamaattumik naalakkersuisut taakku marluk suleqatigiissitaliorput, namminersorneq pillugu aaqqissuussinerup iluani aningaasatigut iluanaaruteqarnissaq siuarsarniarlugu Kalaallit Nunaanni Danmarkimilu inuussutissarsiornikkut suleqatigiinnerup siuarsarnissaanut suleqatigiissitaq taanna siunnersuusiussaaq. Siunertaavoq Kalaallit Nunaanni aningaasanik iluanaarutaalersinnaasunut aningaasaliinissaq.
Kalaallit Nunaanni aningaasanik iluanaarutaalersinnaasunut aningaasaliinissamut aporfiusinnaasut suliamut ilaatillugit qulaajarnerisigut tamanna pissaaq. Aammattaaq inuussutissarsiummik ingerlatallit naleqquttut suleqatigalugit Kalaallit Nunaanni aningaasaliinissamut periarfissat sammineqarnerulernissaat suleqatigiissitap anguniassavaa, tassunga ilaalluni Kalaallit Nunaanni aningaasaliisartunik isumasioqatigiissitsiluni ataatsimiititsinissap pilersaarusiorneranut tassungalu tunngatillugu sullissinermut ilaatillugu, Nunatsinni isumalluutit pinngortitamiittut sammineqarnerulernissaat.
Inuussutissarsiornermut Aatsitassarsiornermullu Naalakkersuisoq aamma danskit inuussutissarsiornermut siuarsaanermullu ministeriat peqatigiillunik suleqatigiissitaliussapput. Suleqatigiissitaq Inuussutissarsiornermut Aatsitassarsiornermut Suliffeqarnermullu Naalakkersuisoqarfimmi aamma danskit inuussutissarsiornermut siuarsaanermullu ministeriaqarfianni atorfilittanik inuttaqassaaq.
Inuussutissarsiornermut Aatsitassarsiornermut Suliffeqarnermullu Naalakkersuisoq Jens-Erik Kirkegaard:
”Siuarsaanissaq anguniarlugu aatsitassarsiornermik ikummatissarsiornermillu siunissami ineriartortitsinissamut atatillugu kalaallit suliffeqarfiutaasa eqqortunik suleqateqarnissaat pingaaruteqarluinnarpoq. Danskinik inuussutissarsiummik ingerlatalinnik suleqateqartarneq qangali ileqquuvoq, tamatsinnullu iluaqutaasussamik suleqatigiinneq tamanna ineriartortineqarsinnaavoq. Danskit qanoq iliorsinnaanermut ilisimasaat aammalu kalallit piffimmut ilisimanninnerat akulerukkaanni suleqatigiinnissamut toqqavissaq nukittooq pilersinneqassaaq.”
Inuussutissarsiornermut Siuarsaanermullu ministeri Annette Vilhelmsen:
”Nuannaarutigingaarpara aningaasanik iluanaaruteqarnissaq anguniarlugu Kalaallit Nunaanni aningaasaliinissamut soqutiginninneq annertusarniarlugu suleqatigiinneq aallarnerneqarmat, peqatigisaanillu Kalaallit Nunaanni Danmarkimilu inuussutissarsiummik ingerlatallit suleqatigiinnerat annertusarneqarluni.
Kalaallit danskillu suliffeqarfiutaat suleqatigiinnissamut aallaavissarissaarput. Taamaattumik danskit suliffeqarfiutaasa suleqataalernissaat pissusissamisuuinnartut isigaara.”
