Sukkornermik nappaatillit amerliartupiloorput

Nunarsuaq tamakkerlugu sukkornermik nappaatillit, ilimagisamit suli amerlanerujussuusut Naalagaaffiit Peqatigiit peqqinnissakkut suleqatigiiffiata WHO-p misissuinerani erserpoq.
Allattoq Nûno Isbosethsen
juunip 27-at 2011 09:41

Inuit 347 milliuuninit amerlanerusut nunarsuaq tamakkerlugu sukkornermik nappaateqassangatinneqarput, tassa 1980-imi sukkortunut sanilliullugit marloriaammik amerleriarsimallutik.

Nappaat Type 2-mik taaguutilik sukkornermi nalinginnaanerpaavoq.Tassa nappaat taanna pualavallaarnermit timillu aalatippallaannginneranit aallaaveqarpoq.

Sukkornermik nappaateqarneq siusinaartumik paasineqartillugu nappaat ingalassimatinneqarsinnaasoq ilisimatuunit oqaatigineqartarpoq. Tassa inuit timersornerulernissaannik  peqqinnarnerusunillu nerisaqalernissaannik innersuussinerit malitsiganik sukkulinngitsoortoqarsinnaammat.

Kinami Indiamilu sukkortut malunnaatilimmik amerliartupiloortut Naalagaaffiit Peqatigiit peqqinnissakkut suleqatigiiffiannit  ilisimatitsissutigineqarpoq.

Kalaallit Nunaanni sukkornermik nappaateqalersartut malunnaatilimmik aamma amerliartupiloortut, misissuinerittaaq takutippaat. Tassa inersimasuni inuit quliugaangata ataaseq sukkortuusartoq, misissuinermi paasineqarmat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq