Suiaqatinoortut katissinnaalernissaat tapersersorneqarluartoq

Arnaqatiminnik anguteqatiminnilluunniit aappaqartartut allatulli katissinnaasariaqarput. Inatsisartut upernaakkut ataatsimiinnissaanni inatsisissatut siunnersuut akuerineqassagunartoq taama oqaasertaqarpoq.
februaarip 28-at 2015 12:00
Nutserisoq Erna Lynge

Inuit marluk arnaqatigiit anguteqatigiilluunniit asaqatigiittut katissimasutut imminnut oqaatigisinnaasariaqarput.

Siunnersuut taanna Inatsisartut upernaaq manna taasissutigissavaat.

Tusarniaassutigineqarnerata inernerata ersersippaa, siunnersuut tapersersorneqartorujussuusoq. Kalaallit Nunaanni Inuit pisinnaatitaaffii pillugit siunnersuisoqatigiit, meeqqat angajoqqaalu peqatigiiffiisa siunnersuut aamma tapersersorpaat.

Siunnersuut akuerineqarpat arnaqatiminnik anguteqatiminnillu aappaqartartut ukioq manna oktobarip aallaqqaataa aallarnerfigalugu katissinnaalissapput.

LGBT: Qilanaarisorujussuuarput

Peqatigiiffiup arnaqatinoortut, anguteqatinoortut kiisalu arnat angutitut imaluunniit angutit arnatut misigalutik inunngorsimasut peqatigiiffiata, LGBT-p, aamma tamanna neriuuteqarfigaa; siulittaasua Tina Egede ima oqarpoq:

- Uatsinnut tamanna pingaaruteqarpoq, allatullimi piginnaatitaaffeqarusuttorujussuuvugut.

- Qilanaarisorujussuuarput, ukiunimi kingullerni inuiaqatigiinnit politikerinillu tapersersorneqartupilussuusimavugut.

Aappariit arlallit utaqqivaat

Tina Egede naapertorlugu inatsit akuerineqassappat aappariit arlallit angerfigeqatigiinnissartik utaqqivaat.

- Nunatsinni arnaqatinoortorpassuit anguteqatinoortorpassuillu katinnissartik qilanaarlutik utaqqiinnarunarpaat. Tassami allatulli piginnaatitaaffeqalernissarput amigaatigisimavarput. Taamaattumik amerlasuut periarfissaq taanna qilanaaraat.

Tusarniaanermi akissutini taamaallaat Kalaallit Nunaanni biskoppi erseqqissaavoq, Ilagiit inatsisaat naapertorlugu palasi kinaluunniit arnaqatigiit anguteqatigiilluunniit katitinnissaannut naaggaarsinnaatitaasoq, palasip nammineq paasinnittaasaanut tamanna akerliuppat.

Aamma atuaruk Suiaaqatigiit katissinnaanerat pillugu inatsisissaq kinguaattuungaatsiassaaq

Inatsit akuerineqarpat pisortatigoortumik aappariinnermut uppernarsaateqartoqassaassaaq. Taamatulli aappariilereersimasut aappariittut atuunnerat ingerlaannassaaq.

Kissaatigigunikkulu katissimanermut inatsimmut nutaamut atalerusullutik taava kommunimut saaffiginnissinnaapput.

Arnaqatinoortut anguteqatinoortullu katissinnaanerat akuerineqarpat, aappariilersut arnatut angutitullu aappariittut aamma meerarsiartaarsinnaalissapput.