Suiaaqatigiit katissinnaanerat pillugu inatsisissaq kinguaattuungaatsiassaaq
Nunatsinni anguteqatinoortut arnaqatinoortullu katikkusuttut utaqqisariaqartussanngorput. Inatsisiliornikkummi kukkuluttortoqarneratigut suiaaqatigiit katissinnaanerat pillugu inatsisissatut siunnersuut kinguaattuungaatsiartussanngorpoq.
Katittarneq avittarnerlu pillugit inatsisip aamma ilaqutariit pillugit inatsisiliornerup, naalagaaffimmit suli oqartussaaffigineqartut, allanngortinneqarnissaat Inatsisartuni qangali akuerineqareerpoq. Allannguutissallu inatsisartut maanna ataatsimiinnerisa nalaanni suliarineqartussaagaluarlutik. Naalakkersuisulli Inatsisartullu akornanni suleriaatsitigut annertunngitsumik kukkuluttortoqarneratigut suliarineqarnissaat ukiakkut ataatsimiinnissamut kinguartinneqarput.
Michael Rosingip Demokraatineersup kinguartitsisoqarsimaneranut suna pissutaanersoq §37 naapertorlugu apeqqutaanut Aleqa Hammondip akissutaani tamanna atuarneqarsinnaavoq.
Upernaakkut ataatsimiinnermi inatsisissatut siunnersuutissap piffissaq eqqorlugu tunniunneqarsimannginnera pissutigalugu Inatsisartut Siulittaasoqarfiata inatsisissatut siunnersuutip suliarineqarnissaanik itigartitsisimasoq maanna erserpoq. Naalagaaffiup Sinniisoqarfiata kukkunerup malitsigisaanik naalisagaq inatsisinut ataatsimoortunut ilaasoq ataaseq nutsinngitsoorsimavaa.
Naalakkersuisullu siulittaasuat Inatsisartut Siulittaasoqarfiannut kukkusoqarsimaneranik aammalu siunnersuutinik tunniussiffissaq akunnernik ikittuinnarnik qaangerneqarsimaneranik erseqqissaateqaraluartoq, suiaaqatigiit katissinnaanerat pillugu inatsisissatut siunnersuut Siulittaasoqarfiup itigartissimavaa.
Aleqa Hammondip inatsisit ataatsimoortut nassatarisaannik angajoqqaatut akisussaanermut qitornamillu peqateqarnermut malittarisassat ataatsimoortumik nutarterneqarnissaasa utaqqissunneqartariaqarnissaannik tunngavilersuuteqarnera aamma iluaqutaasimanngilaq.
Inatsisartut Siulittaasoqarfiata itigartitsineratigut innuttaasut arlallit, meeqqat inersimasullu illersorneqarnissaasa pisinnaatitaaffiisalu pitsanngorsarneqarnissaat utaqqissunneqartariaqassasoq, Naalakkersuisut siulittaasuat Michael Rosingimut Demokraatineersumut akissutimini taama allappoq.
Suiaaqatinoortut katissinnaanissaat ukiormanna juulip aallaqqaataanit piviusunngortussaagaluarpoq. Nunatsinni anguteqatinoortut arnaqatinoortullu pisortatigoortumik appaariilersinnaapput, oqaluffimmili katissinnaanatik.
