Suiaassuseqatiminnik atoqateqartartut oqaluffimmi katissinnaalissapput
Danmarkimi naalakkersuisut inatsisissatut siunnersuut ukiumi nutaami saqqummiutilersaaraat Naligiissitaanermut Ilageeqarnermullu ministerinngorlaap Manu Sareenip aviisimut Jyllands-Postenimut oqaatigaa.
- Suiaqatinoortut siulliit oqaluffimmi 2012-imi upernaakkut katissinnaanngornissaat ilimanarpoq. Qilanaareqaaralu suiaqatinoortut siulliit oqaluffimmiit katissimallutik anippata silataani qaqorteqqasunik milloortunut ilaanissara, Manu Sareen aviisimut oqarpoq.
Taama nalunaarnera tupaallannartoqanngilaq. Manu Sareenimi Ilageeqarnermut ministerinngunnginnermini suiaqatinoortut oqaluffimmi katissinnaanngimmata ilagiinnit aniniarluni eqqarsaatigisimallugu oqaatigereermagu.
Inatsisissaq nunatsinnut sunniuteqarsinnaavoq. Ilageeqarnermut Naalakkersuisoq Mimi Karlsen siorna ima oqarpoq:
- Ilageeqarneq akisussaaffigilereeraluarlutigu, katititsisarneq aamma aappariinnermik akuersilluni nalunaarsuisarnermut tunngasut suli akisussaaffigilinngilavut. Isumaqarpungalu tamakku aamma akisussaaffigilissagivut. Taamaalisoqarpat qallunaalluunnit tamakkununnga inatsisaat allanngortinneqarpata biskoppi oqaluffimmi najoqqutaasinnaasunik oqaloqatigissavara, Mimi Karlsen KNR-imut taamani oqarpoq.
Qallunaallu inatsisaat tamakkununnga tunngasut allanngulerunarput. Kalaallillu biskopiat Sofie Petersen suiaqatinoortut katissinnaalernissaannut tapersersuilluni oqareernikuuvoq.
- Oqaluffimmi katissinnaalertitserusuttunut ungasinngilanga. Inuimmi inooqatigiit asaqatigiinnerannut, suiaqatinoortuugaluarpataluunniit, eqqartuussisussaanngimmata, Sofie Petersen oqarpoq.
Anguteqatiminoortartut arnaqatiminoortartullu ullumi aappariittut akuerisaasutut nalunaarsorneqarsinnaasarput kingornalu palasimit pilluaqquneqarlutik.
