SU nutaaq kalaallit ilinniartut atulerpaat
- Kalaallit Danmarkimi ilinniagaqartut qaammammusiarisartagaat amerleriaateqassapput, taakkumi qaammammut 1.000 koruuninik pissarsinerusalissanerisa saniatigut akileraarutitigut iluanaaruteqarnerusalissapput, Kalaallit Nunaanniillu immikkut tapiissutigineqartartut suli pigiinnassallugit, Pia Rosing Heilmann oqarpoq.
Kalaallit ilinniagaqartut immikkut tapiissutisiarisagaat tassaapput ukiumoortumik akiliunneqarluni nunatsinnukarsinnaaneq, atuagarsiutissanut tapiissutit, nakorsaatinut, tarnip pissusaanik ilisimasalimmik katsorsarneqarnissamut tapiissutit kiisalu kigutit nakorsaannut tapiissutit. Kalaallillumi Danmarkimi ilinniartut naammagittaalliuutissaqarsimagunanngimmata ilinniagaqartunik siunnersuisartoq suli saaffigineqarsimanngilaq.
- Ilinniagaqartut atugarissaarnerulersimassaqaat. Periuserli maanna atuuttoq nutaajoqimmat sukumiinerusumik nalilersuiffigisinnaanngikkallarparput, aajunali ajoqutissartatuaa: Ilinniagaqartut ilinniarnertik naammassipallattariaqartalissavaat, atuanngiffeqarallarsinnaanerimi ajornakusoornerusalissammata, tassa ilinniartut ilinniakkaminnik naammassinniaarnissartik pisussaaffigilissammassuk, Pia Rosing Heilmann oqarpoq.
Kalaallimmi ilinniagaqartut qaammatini 82-ini qaammammusiaqarsinnaatitaapput, massa qallunaat ilinniagaqartut qaammatini 70-iinnarni qaammammusiaqarsinnaatitaasartut, tassa qaammammusiaqarsinnaaneri ukiumik ataatsimik sivikillineqassaaq.
- Tamanna kalaallinut ilinniagaqartunut arlalinnut ajornartorsiutaalersinnaavoq, ilinniarnerammi qallunaatut tuluttulluunniit ingerlanneqartarmat, Pia Rosing Heilmann oqarpoq.
Danmarkimilu kalaallit ilinniagaqartut qallunaat ilinniagaqarnersiutaanik pisalerneri nuannaarutigisimassajunnarsivaat, Kalaallit Nunaanniimmi ilinniagaqarnersiutit kingumoortumik pineqartarput, massa qallunaat ilinniagaqarnersiutaat siumoortumik tunniunneqartartut. Tassa kalaallit Danmarkimi ilinniagaqartut qaammammusigamik marloriaammik qaammammusimmata qujanassaqaaq.
