TAKSØEP NALUNAARUSIAA Illersornissaqarfiup Issittumi suliniutai nukittorsarneqarlik
Tamanna kalaallit tamarmik pitsaanerusumik interneteqalernissaannik kinguneqarsinnaavoq.
Kalaallit Nunaata, Savalimmiut Danmarkillu kissaatigisamittut Issittoq ineriartortissinnaavaat.
Diplomateq danskiusoq Peter Taksøe-Jensen taama unnersuussinermi siuttuuvoq.
- Sumiiffinnut allanut naleqqiullugu Danmark, Savalimmiut Kalaallit Nunaallu ineriartornermut sunniuteqarsinnaasorujussuupput, Issittumummi soqutiginnittut amerlavallaanngimmata. Suliniutinut nutaanut taakku ammaassisuusinnaapput.
Issittumi illersornissaq nukittunerusoq
Taksøep tigussaasumik kaammattuutigaa, Folketingip isumaqatigiissunni sivitsussangaa ikinnerpaamillu 120 millioner koruunit Illersornissaqarfiup Issittumi suliniutaanut ukiumut atortarlugit.
Soorlu qaammataasatigut nakkutilliissutit pitsanngorsarnerisigut killeqarfinnik nakkutilliineq, annaassiniarnerit avatangiisinillu nakkutilliinerit pitsanngorsarneqarsinnaapput.
Aamma atuaruk TAKSØEP NALUNAARUSIAA Danskit illersornissaqarfiat imatut nukittorsarneqassaaq
Tamatuma saniatigut Issittumi Sakkutooqarfik piumassutsiminnik nakkutilliisussanik suleqatigiiffiliorsinnaavoq, sakkutuujunngitsut ajutoornernik kalerriisartunngortinnerisigut.
Internet tamanut
Illersornissaqarfittaaq attaveqatigiinnertigut pitsanngorsaavigineqartariaqarpoq aamma kalaallinut interneti eqqarsaatigalugu iluaqutaasussamik.
- Illersornissaqarfiup aningaasaliiffissaani soorlu attaveqatigiinnerup iluani Issittumut iluaqutaasumik aningaasaleeqatigiittoqarsinnaavoq. Isumaqarpunga Indiami nunaqarfinniit siulliullutik kalaallit nunaqarfii interneteqalernissaat sulissutigisariaqaripput.
Internetip pitsanngorsaaffigineratigut Kalaallit Nunaanni inuussutissarsiutitigut ineriartortitsisinnaavugut, Taksøe erseqqissaavoq.
- Tamannattaaq takornariaqarnermut allanullu iluaqutaasinnaavoq. Eqqarsaatigiuartariaqarparput Kalaallit Nunaannut inuussutissarsiutinullu ajunngittumik sunniuteqarnissaa.
Aamma atuaruk Danskit nunanut allanut politikkianni Nunarput Issittorlu immikkut sammineqartut
Pingaarnertut Taksøe-Jensen isumaqarpoq naalagaaffeqatigiinnermi Issittoq ukkatarineqarnerusariaqartoq:
- Pissaanermuinnaanngilaq. Ineriartornerli naalagaaffeqatigiinnermut nuannaarutaasariaqarpoq. Danmarkimi inuinnarnut naleqqiullugu kalaallinut sunniuteqarnerussagunarpoq. Taamaattumik Issittoq soorunami ukkatarineqartariaqarpoq.
Nalunaarusiaq danskit naalakkersuisuinit siorna septembarimi suliakkiissutaavoq.
Naalakkersuisut Nunanullu allanut tunngasunut ataatsimiititaliaq innersuussinissaminnut periarfissinneqarsimapput, naammassineqannginneranilu Nuummi tamanut ammasumik ataatsimiisitsisoqarsimalluni.
