Kulturi

Agiartartoqatigiit peqatigiiffeqalersut

Peqatigiiffik nutaaq nunatsinni tallimanngormat novembarip ulluisa 23-anni pilersinneqarpoq, tassami Nunatta Agiartartoqatigiivi pilersinneqaramik.

Allattoq Mads Lynge

novembarip 27-at 2018 10:10

Nunatsinni illoqarfinni pingasuni maanna agiartartoqatigeeqarpoq nipilersoqatigeeqarlunilu, tassa Nuummi, Maniitsumi Uummannamilu agiartartoqatigeeqarami.

Kikkulluunniit Nunatta Agiartartoqatigiivinik tapersersuisinnaapput ilaasortanngorsinnaallutillu, sumiluunniit najugaqaraluaraanni.

Meeqqat, inuusuttut inersimasullu agiartartut peqatigiiffimmi ilaasortaapput, tassa agiartartut, agiarsuillu ilaannik cellomik, violamik kontrabassimillu nipilersortartut.

Nunatta Agiartartoqatigiivini siulersuisut:

Siulittaasoq: Dorte Vangsø Simononsen, Maniitsoq

Siulittaasup tullia: Hanne Saandvig Immanuelsen, Nuuk

Aningaaserisoq: Michael Schluchtmann, Nuuk

Siulersuisuni ilaasortaq: Sofia Hernandez, Uummannaq

Sinniisoq siulleq: Ida Mortensen, Maniitsoq

Sinniisup tullia: Ane Lyberth, Maniitsoq

Agiartartut ineriartortuarnissaat peqatigiiffiup Nunatta Agiartartoqatigiivisa siunertaraat, ilinniartitsisullu angalanerat aningaasarsiassaallu aamma matussuserniarneqartassallutik.

Illoqarfiit agiartartoqatigeeqartut akornanni agiartartunik ilinniartitsisunillu paarlaateqatigiittoqartarsinnaassaaq, soorlu aamma pikkorissartitsinerit suliniutillu aningaasaliiffigineqarsinnaanissaat sulissutiginiarneqartoq.

Nunatta Agiartartoqatigiivi aningaasaateqarfik aqqutigalugu aningaasalersorneqassaaq, assersuutigalugu ilaqutariit ukiumut 100 koruuneerlutik ilaasortanngorsinnaallutik, inuillu ataasiakkaat ukiumut 50 koruuneerlutik ilaasortanngorsinnaassallutik.

Agiartartoqatigiit peqatigiiffeqalersut

Aamma atuaruk