Storebæltimi ajutoortoqarnerani ajunaartut ilaqqittut
Ajutoortoqarnerani angutit pingasut arnallu tallimat ajunaarput, ajunaartullu tamarmik inersimasuusut, Fynimi politiit ullaaq manna nalunaarutigaat.
Politiit misissuineranni paasineqarpoq qimuttuitsut ajutoornerannit inuit marluk aamma ajunaarsimasut - taamaalilluni ajunaartut arfineq pingasunngorput.
AAMMA ATUARUK Isumaqarlunga ajunaalerluta
- Qimuttuitsut unnuaq naallugu misissuiffigeqqissaarparvut, soorlu ippassaq aamma oqaatigigipput, sila anorlerpoq tamannalu misissuinitsinnut sunniuteqarpoq, politiit pisortaat, Arne Gram oqarpoq nangillunilu:
Qimuttuitsut misissuiffigisagut tikikkuminaassimapput, unnuarlu misissuinitsinni ajoraluartumik paasivarput ajunaarsimasut marluk qimuttuitsumiittut, taamaalillutik ajunaarsimasut arfineq pingasunngorput, politiit pisortaat, DR-mut oqarpoq.
AAMMA ATUARUK Storebæltimi qimuttuitsut ajutoorneranni inuit arfinillit ajunaartut
Ajunaartut qimuttuitsuni saarlermiissimasut politiit aamma ilisimatitsissutigaat.
Ajunaarsimasut sisamat kinaassuserneqareerput - ajunaarsimasullu sinneri sisamat suli kinaassusersineqanngillat.
Politiillu neriuutigaat, ajunaarsimasut tamarmik ullumi kinaassuserneqassasut.
Qimuttuitsuni ilaasimasut allat aqqunartitersimasut 14-t Odensemi Universitetshospitalimit angerlareerput, ajutoortoqarnerani inuit katillugit 16-it aqqunartiterput.
