Steen Lynge siulittaasup tulliatut tunuarpoq

Inatsitsartut upernaakkut ataatsimiinnissaannut Atassutip ilaasortaatitaasa siunnersuutaasa ilanngunneqanngitsoornerinut, partiimi siulersuisunut ilaasortat akisussaaqataasut, Atassutip siulittaasua Gerhardt Petersen ullup qeqqanut radioaviisimi oqarpoq.

- Soorunami tamanna ajuusaarnarpoq, Steenip nammineerluni oqaloqatigeqqaarsimassagaluarpaanga, kisianni tusagassiutinut nalunaaruteqaqqaarsimanera tusaatissatut tiguara, Gerhardt Petersen oqarpoq.

Steen Lynge Atassummi siulersuisumut tullersortitut tunuarniuteqarnermini allakkamini ilanngullugu erseqqissarpaa Atassummi siulittaasup Gerhardt Petersenip radioaviisimut oqaatigisaa Atassummi siulersuisut Inatsisartut upernaakkut ataatsimiinneranni isumaqatiginagu, tassa oqaatigisaa inatsisartuni ilaasortaatitami oqaluuserisassanik siunnersuutissanik nassiussinissaat Atassummi siulersuisut akisussaaffeqarfigigaat.

Aamma oqaatigaa aaqqissuussaanikkut siulittaasup tullia Hans Lyberth peqatigalugu siornali decembarimi inatsisartut ataatsimiinnissaannut eqqartorneqartussanik iluarsaaniarsimagaluarlutik kinguneqanngitsumik.

Taamaammat Steen Lynge partiimi siulittaasup tulliatut tunuarpoq.

Gerhardt Petersenilli eqqaasitsissutigaa Atassummi siunertaasut Steen Lyngep tunuarnerata kingorna allannguuteqarunnanngitsut.

Godmand Rasmussen Atassutip siulersuisuani ilaasortap oqaatigaa Atassummit Inatsisartunut ilaasortaatitat upernaakkut ataatsimiinnissami siunnersuutaat siulersuisuni oqaluuserineqarsimanngitsut, kisianni partiimi siulittaasup attaveqaqatigiinneq ajornartorsiutaannginnerarpaa.

- Siulersuisuni attaveqatigiinnerput ajunngilluinnarpoq, eqqartugassat aamma Inatsisartuni ilaasortat peqatigalugit eqqartorneqartarput, Gerhardt Petersen oqarpoq.

Aamma oqaatigaa Atassummi siulersuisut qineqqusaarlutik sassartaarnikuugamik qinigaallutillu Steen Lynge siulersuisunit tunuarnermi tusagassiutitigut suaarutiginera nuanninngitsoq.