Ministeriuneq coronamut Danmarkimi akiuussutissaliortaleqqusisoq
Coronavirusimut Danmarkimi aappaagumit akiuussutissaliortoqartalissasoq, ministeriunerup Mette Frederiksenip kissaatigaa.
Tamanna pillugu tusarniaasoqareerneratigut kingornalu suliariumannittussarsiuussereernikkut pissaaq.
Ministeriuneq tusagassiorfinnut assigiinngitsunut ataasinngornermi unnukkut taama oqarpoq.
- Danmarkimi niuernerpalaartumik akiuussutissaliornissamut tunngavissaqartoq immikkut ilisimasallit piffissami kingullermi oqaloqatiginerisigut paasivarput, ministeriuneq aviisimut Børsenimut oqarpoq.
AAMMA ATUARUK Nakorsaaneq: Tusatsiakkanik eqqunngitsunik siammarteriunnaarlusi
Coronavirusimut akiuussutissat isumannaallisaanermut politikkimut tunngassuteqartut, ministeriunerup Børsenimut tamanna oqaatigeqqippaa.
Suliffeqarfiit aalajangersimasut coronavirusimut akiuussutissaliortuussanersut, Børsenimut erseqqissaatigerusunngilaa.
Assersuutigalugu nakorsaasiorfiit Pfizerip Modernallu akiuussutissaliornermi teknologii tunngavigisaat assigalugu Danmarkimi akiuussutissaliortoqassasoq, Mette Frederiksen TV2-mut oqarpoq.
Innuttaasut akileraarutaat qassit suliniummut atorneqarniarnersut taassuma oqaatigerusunngilaa.
Suliniulli piviusunngussappat Folketingimi amerlanerussuteqartunit akuersissutigineqartariaqartoq, TV2 allappoq.
