Statens Kunstfond utoqqatsissuteqarpoq

Statens Kunstfond-imi atuakkiortunut ataatsimiisitaliap Niviaq Kornerliussen utoqqatserfigaa, eqqumiitsuliortullu kulturimut qinnuteqaataanut itigartitsinermut tunngaviusoq kukkunerarlugu, qinnuteqaataalu kingorna akuerineqarpoq.

Atuakkiortup tamanna nuannaarutigaa:

 - Naalagaaffimmit akuerineqarnera uannut isumalerujussuuvoq.

Niviaq Korneliussen atuakkiaqqaatini "Homo Sapienne" franskisut nutserneqarnikoq Parisimi saqqummersitsisoq, oqaloqatigigatsigu KNR-imut taama oqarpoq.

Kalaallit atuakkiortui, qallunaat atuakkiortuisuulli atuagaateqarfinnut allanut oqalugiariartorlutik qimuttuitsunut ikiinnarsinnaanngillat.

Taamaattumik namminersortutut eqaatsumik aningaasarsiorniarsarisariaqartarpugut, Niviaq Korneliussen nassuiaavoq, nammineq nutserisutut aningaasarsiortarpoq, sulianilu nuannarigaluarlugit atuakkiami aapperniarnissaanut ajornakusoortitsivoq.

 - Aningaasaateqarfimmit akuerisaanera isumaqarpoq aamma eqqissiimillunga anersaartorfeqalissasunga, atuakkiamalu aappassaat ingerlassinnaanngussagiga, Niviaq Korneliussen oqarpoq.

Statens Kunstfond pillugu inatsimmi allaqqavoq, Savalimmiunut Kalallillu Nunaannut atuutinngitsoq, Namminersornerullunilu Oqartussanngornermi kultureqarneq nunatsinnit akisussaaffik tiguneqarpoq.

Namminersorlutik Oqartussat nunatsinni eqqumiitsuliortortatsinnik tapersersuisariaqannginnersut, Niviaq Korneliussen aperineqarami ima akivoq.

- Namminersorlutik Oqartussat eqqumiitsuliortut soorunami tapersersussavaat. Naalagaaffili aamma tapersersuisariaqarpoq, naalagaaffiummi ataaniippugut. Naalagaaffeqatigiinniippugut, danskisullu innuttaassuseqarluta, Niviaq Korneliussen oqarpoq.

Ilanngullugu nassuiaatigaa, eqqumiitsuliortorpassuit allat aamma qinnuteqartarmata.