Start Up Greenland Qaqortumi

Aaqqissuussinerup siunertaraa, peqataasut isumassarsiaminnik saqqummiussissasut, taava isumassarsiaat siunnersortit arlallit ikiortigalugit nalunaaquttap akunneri 54-it ingerlanerini suliffeqarfimmut ilusiliamik ilivitsumik inerisaassapput. Isumassarsialli pitsaanerpaat kisiisa tamakkiisumik ingerlanneqassapput.

Start Up Greenland Nuummi Sisimiunilu ingerlanneqareerpoq, maannalu Qaqortumi ingerlanneqartussanngorluni, Inuussutissarsiornermut, Aatsitassanut Suliffeqarnermullu Naalakkersuisoqarfik tusagassiorfinnut nalunaarummi taama allappoq.

- Peqataalluartoqarnera tulluusimaarnaqaaq inuussutissarsiutinillu ingerlatsisut kajumissaarilluaqaat. Inerisaatitsineq ataatsimooqatigiinnermik pilersitsivoq peqataasullu nukissaqarluarput, inerisaatitsinermut siunnersorti Lars Kranker Sisimiuni Start Up Greenlandip 20-t sinnerlugit peqataaffigineqartup naammassereernerani oqarpoq.

Aallarnisaasunut aaqqissuussinermi kingullermi Ole Møllerip multifabrikkimik taasamik isumassarsiaa aaqqissuussinermi pitsaanerpaatut toqqarneqarpoq, tassalu assigiinngitsunik atoqqiinikkut nutaanik nioqqutissiorneq.

-Start Up Greenland iluaqutigeqaara, isumassarsiara pillugu inuit akornanni saqqummiisinnaaneq periarfissiissutigineqarmat iluaqutigeqaara, Ole Møller 33-nik ukiulik "Ole Opfinderimillu" ateruserneqarsimasoq oqarpoq.

Multifabrikkimi atoqqiilluni assigiinngitsunik tunisassiortoqartassaaq, soorlu assakaasunit qaartitserinermi assiaqutissat sananeqartassapput. Aalisakkanik tunisassiornermi sinnikut aamma qisukut akugalugit naggorissaasiortoqartassalluni aamma aluminiumimik umiatsialiassat katiterneqartassallutik. Tunisassiallu taakku tamarmik nunanit allaniit nioqqutissanik eqqussuinermik annikillisaaqataassapput

Qaqortumi peqataarusukkuit aqagu nal. 17.00 Niuernermik Ilinniarfimmukaannassaatit.

Start Up Greenlandip Ilulissani Aasiannilu ukiariartornerani ingerlanneqarnissaa pilersaarutaavoq , taakkunanilu ajugaasut Nuummi sapaatip akunnerisa 47-anni naapisinneqassapput.