Air Greenland Nakorsartittariaqartunut timmmisartoq nutaaq
Tamanna Peqinnissaqarfiup timmisartuutileqatigiiffiullu Air Greenlandip isumaqatigiissutaani ukiuni pingasuni atuuttussami atuarneqarsinnaavoq.
Isumaqatigiissut nutaaq 1. juli 2019 - 30. juni 2022-mi atuutissaaq,
taassumalu kingunerisaanik Peqqinnissaqarfimmut timmisartoq ambulance ukioq kaajallallugu ullormut nalunaaquttap akunnerini 12-ini atugassanngortinneqarpoq
Timmisartumik King Air-imik nutaamik pisinerup kingunerissavaa, Peqqinnissaqarfiup innuttaasunut angallanneqarnissamik pisariaqartitsisunut neqeroorutaasa qaffasissumik pitsaassuseqaannarnissaat qulakkeerneqassammat, Air Greenland tusgassiuutinut nalunaaruteqarluni taama allappoq. Timmisartoq Super King Air nutaaq 2019-mi Nuummut minnissaa naatsorsuutigineqarpoq.
- Isumaqatigiissuteqarnikkut Peqqinnissaqarfiup innuttaasunut angallanneqarnissamik pisariaqartitsisunut neqeroorutaasa qaffasissumik pitsaassuseqaannarnissaat qulakkeerneqassaaq, tamannalu nuannaarutigaarput suleqatigiinnerullu ingerlaqqinnissaanut qilanaarluta,” Peqqissutsimut Pinaveersaartitsinermullu Aqutsisoqarfimmi aqutsisoqarfimmut pisortaq Malene Marie Nielsen oqarpoq.
King Air nutaaq Kalaallit Nunaata iluani aammalu Kalaallit Nunaata Islandillu akornanni timmisartuussisassaaq.
Timmisartoq nutaaq immikkut ittumik sananeqarluni Peqqinnissaqarfiup aamma Air Greenlandip akornanni tunngavissiarineqartut malillugit Kalaallit Nunaanni pissutsinut naleqqussagaassaaq.
AAMMA ATUARUK Air Greenland isumaqatigiissusioqqippoq