Nunanut allanut unammisartut Unammisartuniiginnissanerlutik nalornissutigaat

Timersoqatigiiffimmi Kâgssagssuk mi isikkamik arsaattartup Tekle Ghebrelul assileriarlugu aapakaat banaanillu assinginik ikussiffigaa nittartakkanilu attaveqatigiittarfimmut takutitassiaralugu. Taanna isikkamik arsaannermi anngunniunnermi  peqataajunnaarsinneqarpoq. Attaveqatigiittarfimmi Facebookimi taassuma aalajangiusimallugu oqarpoq, ammip qalipaa pillugu immikkoortitsinermik isumaqarani, taassumali Kalaallit Nunaanni Isikkamik Arsaattartut Kattuffiat aamma nunanut allanut sungiusaasoq  Tekle Ghebrelul saassutarai. Taassuma arsaqqusaajunnaarsitaanini paasisinnaanagu Facebookimi allappoq, Tekle Ghebrelulimullu kinguneqartitsisoqarani naak taanna siusinnerusukkut  Maniitsumi meeqqamik issuttuussisimagaluartoq. Tamannali eqqunngitsoq Isikkamik Arsaattartut Kattuffianni siulittaasuusimasoq allappoq. Tekle Ghebrelul Maniitsumi unammisoqartillugu isiginnaartunut ajortisaarisimanini aamma ammip qalipaataa pillugu immikkoortitsinertut nipilimmik saassunneqarnermi kingorna meeqqamik issuttuussisimanini pillugu Isikkamik Arsaattartut Katuffiannit mianersoqqussummik upernaaq manna tunineqarpoq. Nunanut allanut unammisartunut sungiusaasuuneranik  mianersoqqussummik tunineqarpoq,   siulittaasuusimasoq John Thorsen taama allappoq. Arsaattartup arsaateqqussaajunnaartup Teklep iliuuserisimasaanik oqarnera GBU-mit misissorneqarpoq. Arsaattartoq allappoq,  anngunniulluni unamminermi Nuummi pisumi Kâgssagssuk isertitsimmat  nuannattoqartillugu Teklep  qiterlini nittarsaassimagaa. Taama iliortoqarsimaneranik oqarneq  arsaaffiup sinaani domeriusup Facebookimini allappaa. Qiterlermik nittarsaassisoqarsimaneq Isikkamik Arsaattartut Kattuffiannut nalunaarutigineqarsimanngilaq, Kattuffiullu arsaattarfiup sinaani dommeriusoq pisoq pillugu attavigivaa, taassumali taama pisoqarsimaneranik uppernarsaasinnaasimanngilaq. John Thorsenip  tusagassiuutinut nalunaarutaa naapertorlugu Teklep assamminik nittarsaassinera assigiinngitsunik paasineqarsinnaavoq.  - Taamali iliortoqarsimaneranik  oqarneq Tekle Ghebrelulip eqqaamanngilaa. Assammik nittarsaassisoqarsimaneranik oqarneq dommerinit, Kâgssagssumiut issivianiittunit, anngunniulluni aaqqissuussisunit B-67-miluunniit unammisunit takuneqarsimanngilaq. -  Tassalu  pasilliutinik uppernarsaatitaqanngitsunik pisoq inerneqarpoq.   John Thorsen allappoq. Arsaattarfiup sinaani dommerip Facebookimut ikkussimasaa tunngaviliullugu, Tekle Ghebrelulip soraarsinneqarnissaanut GBU-mi siulersuisut amerlanerussuteqartut aalajangerpaat.  Soraarsitsineq  John Thorsenip isumaqatiginagu GBU-mi siulittaasutut tunuarpoq. Nunanut allanut unammisartunut sungiusaasoq Futsalernermilu ataqatigiissaarisoq Rene Olsen  soraarsitsineq isumaqatinagu sungiusaasutut soraarpoq.