Spilleautomatinik nuannarisalik: Uerinartorujussuuvoq

Nunatta kitaani innuttat 13 procentiisa aningaasanoorutinut pinnguarneq ajornartorsiutigereersimanngikkunikku ajornartorsiutigilernissaannut aarlerinaateqartut nunatsinni misissuinerup nutaap takutikkaa, ippassaq unnukkut radioaviisimi oqaluttuaraarput.

Piffissaajaataasut tassaapput bingorneq spilleautomatillu.

Nuummi neriniartarfiit ilaat Cafè Chili radioaviisimiit ullaap alakkarterparput spillerumatuumik oqaloqatissarsiorluta.

Angut 36-inik ukiulik spilleautomatit tamarluinnaasa qanoq pissusilersortarnerinik ilisimannilluartoq naappipparput. Taassuma nalunngilaa qanga spilleautomatit 'qaartoorsimanersut', tassa eqquisitsisimanersut, taamaasilluni qaqugu eqqugassanik qaloorisinnaanerluni nalusanngilaa. Ullut tamaasa weekendtinilu spillertarpoq, ilaatigullu spillernikkut aningaasarpassuarnik qalooriniarluni suliffimminiit sulinngiffeqarsimalluni.

- Suliffinninngaanniit freeriarlunga, taavalu sulinngiffeqaraangama spilleriakulasorujussuuvunga, spilleautomatinik atuikulasoq, aterminik isertuusserusuttoq oqarpoq.

Café Chili marlunngornermi ullaap tungaani, igaffimmi sulisut eqqaasanngikkaani inoqangaanngilaq. Iikkami ipput spilleautomatit arfineq marluk qalipaatigissaaqalutillu qullii ikittaartut.

Angut 36-inik ukiulik ilanngutassiami kinaassutsiminik isertuussisoq, spilleautomatip eqqaani nikorfavoq automatilu ingerlaartinnerani isiginnaarlugu. Ilaatigooriarluni toortagassat toortartarpai. Suliffeqarpoq, ullaap tungaanilu pausernermini tuaviinaq biilerluni cafémut spilleriartorpoq. 100 koruunit automatimut ikeriarlugit cafép silataanukaqatigaatigut, spillertarneq pillugu inuuneranik apersulaarniarlugu. Ukiut 15-it 20-it missaasa matuma siorna automatertalerpoq, eqqaamanngilaali qanoq ililluni aallartissimanerluni.

Ludomaniunerit nammineq eqqaavat, qanoq imminut killilersimaarniartarpit?

- Maskiinat "qaareernikuugaangata" malersorniarneq ajorpakka. Iluatsitsisartillunili takorloorsinnaanngilara spillertarninnik unitsitsissasllunga. Qimakkuminaattartorujussuupput, angut oqarpoq.

Suliffimminiit periarfissaqaleraangami spilleriapallattarpoq. Suliffimminiit soraaraangami kiisalu arfininngornermi sapaallu ilanngullugu cafeep matunissaata tungaanut spillertarpoq.

- Spillerneq immini pingaaruteqanngilaq, immaqa aningaasartai pinerullugit spillertarpunga, oqarpoq.

Automatit tamarluinnaasa ikinngutivimmisulli ilisimalluarpai. Nalunngilaa qanga kingullermik automati aningaasanik eqquiffigineqarsimanersoq, qaqugulu eqquiffigineqaqqissanersoq eqqoriarsinnaasarlugu. Paasissutissat tamarmik qaratsamini toqqortortarpai, pilersaarusiukkamillu spillertarluni. Ataasiaq naatsorsorsimavaa cafémi spillit tamarluinnarmik sapaatip-akunnerata ingerlanerani, oqarnerattuut: "qaartoortussanngortut". Ajornarmalli suliffimminut sianerpoq sapaatip-akunnera aggersumi sulinngiffeqarnissaminik qinnuteqarluni.

- Sapaatip-akunnera naammassimmat kisitsivunga. Paasivaralu 50.000 koruunit tungaanut iluanaaruteqarsimallunga, angut oqarpoq.

Automati ataaseq atorlugu amerlanerpaanik aningaasanik pissarsigami 20.000 koruunit pissarsiarisimavai. Aammali aningaasarpassuarnik annaasaqartarpoq. Ullormi ataatsimi 10.000 koruunik angullugit atorsimavai.

- Inuppassuit sikingllutik anisut takusarpakka, suutaarussimallutik. Nammineerluni sikingalluni ilaatigut anisarpoq.

Angut marlunnik qitornaqarpoq aappaqarlunilu. Ilaatigooriarluni spillertarnini pillugu ilaqutaasa qisuariarfigisarpaat.

- Aallarteqqaarama ajornartorsiutinik takkuttoqartarpoq, kisianni oqaloqatigiissimagaangatta aaqqittarpagut, angut spillerumatooq oqarpoq.

Sineriak tamakkerlugu automatit aningaasanik pissarsiffiusinnaasut 174-iupput, taakkunannga 62-it Nuummiillutik. Kisitsisit kingulliit Paarisameersut aallaavigalugit, 2004-mi sineriammi spilleautomatinit aningaasat kaaviaartinneqartut 80 millioni koruunit sinnerpai. Ukioq taanna aningaasat eqqorneqartut 37 millioni koruunit missaanniissimapput.