Ilinniarnertooq2019: - Sorsutassat amerlasimapput
- Nasartaarluni nuanneq, pilluarnaq. Misigissuseq eqqumiik, pilluarnartorujussuuvoq taama angusaqarsinnaagama, Angerdlartunguak Mølgaard, Aasianni GUX-imi ilinniarnertuunngoqqammersoq oqarpoq.
Angerdlartunguak nunatsinni ukioq manna siullersaalluni ilinniarnertuunngorpoq. Tassungalu aqqut imaannaasimanngilaq:
- Napparsimangaatsiarsimavunga, napparsimavimmi uninngasarlunga suliaritikkiartorlungalu taavalu ilinniarnerma ingerlanerani pingasunik annaasaqarsimallunga. Pikkunarsimaqaaq, sorsutassat amerlasimapput.
Tapersersorteqarluarninilu Angerdlartunnguup ilinniakkami naammassinissaanut iluaqutigisimaqaa.
- Tapersersorterpassuaqarama taakkua qujanartarput ikiuuttarsimammata massakkumut angusinissama tungaanut.
Maltami EF
Arnatsiaq Olsen GUX Sisimiuni aamma ilinniarnertuunngoqqammerpoq. Arnatsiap ilinniarnertuunngornini siunissami sumut atussallugu suli qulakkiinngilaa. Ukiamulli pilersaaruteqareerpoq.
- Septemberimi aallassaanga Maltamut EF-eriarlunga, tuluttut ilikkarluarneruniassagama.
Angerdlartunnguaq Mølgaardip ilinniaqqinnissaminut qinnuteqareersimavoq.
- Naatsorsuisunngornissara sinnatoraara. Erhvervsøkonomimut qinnuteqarnikuuvunga. Kisianni aamma ilinniartitsisutut akademi uddannelsemullu qinnuteqarnikuuvunga. Sulilu aalajangernagu sorlerpiarmut ingerlariaqqikkumaarnerlunga.
Ilinniarnertuunngorniarlutik misilitsittussat ukioq manna 289-it missaanniipput. Tassa GUX Nuummeersut, GUX Aasianneersut, Campus Kujallermit kiisalu GUX Sisimiuneersut.
