Sorlak nutaamik siulittaasortaarpoq
Sorlak peqatigiiffinnik kattuffinnillu ataatsimut kattuffigineqarpoq, inuit katillugit 3500-nit ikinnerunngitsut peqataaffigisaannik. Massakkullu siulittaasutut nutaatut ivertinneqarpoq Aili Liimakka Laue, siulittaasup tullersortaatut ivertinneqarluni Paninnguaq M. Kruse.
Sorlammi siulittaasuusimasup Kaalinnguaq Siegstad-ip Maliina Abelsen-ip Inatsisartuni kalaallisut oqalulluni saqqummiussinera facebookikkut isornartorsiorpaa. Tamatuma kingorna oqaatsit pillugit sakkortuumik oqallittoqalerpoq, Kaalinnguaq Siegstad Siumup Inuusuttunut Suleqatigiiffiisa Kattuffianni (SIS) siulittaasutut tunuartariaqalerneranik kinguneqartumik.
Oqaatsit pillugit oqallinnermi Kaalinnguaq Siegstadip oqaatigisai aalassatsitsipput sakkortuumillu isornartorsiorneqarlutik. Tamatuma kingorna siulittaasutut tunuarnissaannik siulersuisut kajumissaarpaat.
- Ulluni makkunani Sorlammi siulittaasup internetikkut kusananngitsumik inuttut avammut kiinnernera Sorlaap ingerlaneranut anguniagaanullu naapertuutinngimmata akerliummatalu siulersuisunik ajuusaarnartutut isigineqarpoq akuersaarneqarsinnaananilu. Tamakku ilaatigut peqqutaaqataallutik siulersuisunit siulittaasoq malittarissassat malillugit tunuaqqussummik nassinneqarpoq. Sorlammi siulersuisut pisoq ajuusaarutigaat, inuttut eqqugaasutut misigisimasoqarpattaaq ajuusaarnartutut isigaarput, Sorlammi siulersuisut tusagassiutinut nalunaarumminni allapput.
Sorlak tulliani oktobarip 26-ani Aasianni ataatsimeersuartitsissaaq.
