Soraarummeerlutik naammassisorpassuit

Aasarpoq, ilinniarfinnilu soraarummeernerit naammassiartulerput. Taamaammallu soraarummeerlutik naammassisut pillugit nalunaarutit amerlapput.

Niuernermik Ilinniarfimmi ilinniartut 67-it tallimanngormat ilinniakkaminnik naammassinnipput, taakkunanilu 22-t ilisimatusarnermut tunngasunik ilinniakkatik naammassisaqarlutik.

Aamma Ilinniarfissuarmi ilinniartut 48-t sapaatit akunnerata siuliani ilinniartitsisunngorput.

Nuna Tamakkerlugu Ilitsersuisarfimmit aqqanillit ilinniartitaanermut inuussutissarsiornermullu ilitsersuisutut naammassipput, pingasullu inuusuttut inersimasullu immikkut pisariaqartitsisut pillugit ilinniakkaminnik naammassinnillutik.

Ilitsersuisut nutaat sisamanngormat naammassipput.

Ilulissani Perorsaanermik Ilinniarfimmi sisamanngormat aamma naammassisoqarpoq. Tassani 15-it socialassistentinngorput, 27-llu isumaginninnermi ikiortinngorlutik.

Socialassistentinngortut qaammatini qulingajanni ilinniagartik naammassivaat, isumaginninnermilu ikiortinngortut ukiut marluk ilinniareerlutik naammassipput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl