Soraarsitsineraaneq ilumuunnginnerarpaat

Inatsisartuni illuatungiliuttut isumaqaqarput siornatigut aningaasaqarnermut ataatsimiititaliami ilaasortaasut Naaja Nathanielsen, Aqqaluaq B. Egedelu IA-meersut kiisalu Niels Thomsen Demokratineersoq ataatsimiititaliamit soraarsitaasimasut.

Piffissami kingullermi aningaasaqarnermut ataatsimiititaliaq Naalakkersuisunut isornartorsiuisarpoq Royal Arctic Linep umiarsuarsinissaanut atatillugu kingullertigullu Air Icelandimut isumaqatigiissut pillugu.

Taamaattorli inuit pineqartut soraarsitsisoqarsimaneraasoqarnera ilumuunnginnerarpaat.

- Imminut tarrarsuummi takusinnaassaguma pisariaqarsorisimavara ataatsimiititaliami ilaasortaajunnaarnissara, taama Niels Thomsen KNR-imut oqarpoq, tamannali itisilernagu.

Aammattaaq ataatsimiititaliap siulittaasorisimasaa naatsuinnarmik oqaasisaqartoq KNRip Inatsisartut torsuusaanni naapippaa.

- Aningaasaqarnermut ataatsimiititaliami ilaasortaaqqinnissara kissaatigisimanngilara, taama Naaja Nathanielsen KNRimut oqarpoq.

Aammattaaq Aqqaluaq B. Egede oqarpoq nammineerluni tunuarsimalluni.

Taamaakkaluartoq illuatungiliuttut isumaqarput pisoq allamik nassuiaatissaqartoq.

- Takorloorsinnaalluarpara naalakkersuisooqataasut partiit arlaat piumasaqarsimasoq inuit aalajangersimasut ataatsimiititaliami peerneqanngippata naalakkersuisooqataajunnaarniarlutik, taama Per Berthelsen Siumumeersoq KNRimut oqarpoq.