Soraarsitaaguni 107 million koruuninnassaaaq
Tuluit Nunaanni tusagassiorfinni nalunaarutigineqartut naapertorlugit, Tony Hayward soraarsitaassagaluaruni tassunga atatillugu 107 millionit koruuninik akissarsisinneqassaaq.
Tusatsiakkat ilumoorpata, Tony Hayward aningaasanik taama amerlatigisunik pissarsissappat, uuliasiortitseqatigiiffimmi BP-mi kingumut eqqissiviilliortoqalissaaq. Tassami Mexicop Kangerliumanersuani uuliap akuiagaanngitsup liiterinik millionilippassuarnik annertussusillip USA-p kujasissuani sinerissami mingutsitsinerata kingorna BP assorsuaq isornartorsiorneqareermat.
Uuliasiorfik Deepwater Horizon apriilip 20-anili qaartoormat, ullullu marluk qaangiummata kivilluni, uuliasiortitseqatigiiffiup BP-p tusaamaneqarnera Tony Haywardip ilungersorluni napparteqqinniarsarisimavaa. Deepwater Horizonimi sulisut aqqanillit qaartoornermi ajunaarput.
Haywardili annaassiniaraluarnermini iluatsitsivallaanngilaq, uuliasiortitseqatigiiffillu USA-mi naalakkersuisunit amerikamiunillu naqisimaneqaqaaq.
Aviisinili The Financial Timesimi aamma The Timesimi ullumi saqqummersuni allaaserineqarpoq, Tony Haywardip 100 millionit koruunit sinnerlugit 'tunuarnersiutinik' tunineqarnissaa pilersaarutaasoq.
Aviisini ilanngullugu allaaserineqarpoq, 100 millionit koruunit assigissagaat ukiumut akissarsiat, soraarnerussutisiat ilanngullugit.
Ilisimatitsissutit assigiinngitsut BP-p tassaanerarpai isumaliutersuutit, neriorsuutigaallu uuliasiorfiutileqatigiiffiup qullersaqarfiani allannguuteqartoqassagaluarpat tamanna nalunaarutigineqarumaartoq.
