Sooruna eqqusseriaraluartut isertitsivimmiissanngitsut
Nunatta Eqqartuussiviata tunngavilersuutaasa ilagaat, issuaaneq aallartippoq: "inatsisinik unioqqutitsineq tamakkiisumik aaqqissuussaasutut isikkoqanngimmat" issuaaneq naavoq, aammali inatsisinik unioqqutitsineq eqqarsaatigalugu pineqaatissinneqartut isummersuutaat tunngavilersuutigineqarsimallutik.
Iluliarmiut angutit pingasut, hashimik nukkassaatinillu eqqussereernerisa kingorna eqqartuunneqarmata, pineqaatissinneqarnerannut tunngasut allakkiat, Nunatta Eqqartuussiviata maanna tamanut atuagassanngortippai, taakkunani ilaatigut atuarneqarsinnaalluni, sooq pineqaatissiineq siulleq allanngorlugu Nunatta Eqqartuussivia inuiaqatigiinnut kiffartuussisussanngortitsisimanersoq.
Hashi 1 kilo 25 grammi, nukkassaatit amerlagaatsiartut aamma hashimik 2 kiilumik eqqusseqqinnissartik siunertaralugu pisiniarsimagaluartutut, Ilulissat Eqqartuussiviannit angutit marluk qaammatini 14-ini pingajuallu qaammatini aqqaneq marlunni pineqaatissinneqaraluarput. Angutit tamarmik 26-inik ukioqarput.
Ikiaroornartup haship aamma nukkassaatit eqqunneqartut annertussusaat eqqarsaatigalugit, pinerluuteqarsimasut inissiisarfianiittussatut ukioq ataaseq sinnerlugu sivisussusilimmik pineqaatissiisoqaraluarpoq.
Tassalu pineqaatissiineq taanna allanngorlugu, Nunatta Eqqartuussiviata aalajangerpaa angutit nalunaaquttap akunnerini 240-ni inuiaqatigiinni kiffartuussissasut.
Taamatut aalajangernermi tunngavilersuutigineqarpoq, inatsisinik unioqqutitsineq tamakkiisumik aaqqissuussaasutut isikkoqanngimmat.
- Unnerluutigineqartup ataatsip ilisimanngilaa sooq ikiaroornartumik hashimik eqqussisimanerluni, taanna isumaqarpoq atorsinnaasaminik ilinniagaqannginnami pissutigalugu taamaaliorsimalluni, eqqartuussinerup nalaani qanoq oqartoqarsimaneranik allakkiami ilaatigut taama allassimasoqarpoq.
Pinerluuteqarsimasut inissiisarfiannut inissinneqarnermi kingorna ikiaroorsimanatik angutit oqaatigaat, tassalu tamanna ilaatigut eqqartuussutip ingerlateqqinneqarnissaanut kissaammi tunngavilersuutigineqartut ilagaat.
Angutit ilaata oqaluttuaraa, pineqaatissinneqarsimasut inissiisarfianniittut ikiaroornartumik hashimik pisiniartartut, taakkulu paarsisunit sioqutigineqarneq ajortut oqaatigalugu.
Aamma allakkiani atuarneqarsinnaasut ilagaat, pineqaatissinneqarsimasut ilaata kissaatigisimagaa ikiaroornartumik atornerluinerminik katsorsarneqarnissani, ataatsillu oqaatigisimavaa, ilisimalersimallugu ikiaroornartoq qanoq ulorianartiginersoq, pingajuata oqaatigaa inissiisarfimmiinnermi kingorna aalajangersimalluni kingorna pinerloqqinniarani.
Inuiaqatigiinni kiffartuussineq piviusunngussaaq ukiut marluk maannamiit qaangiutsinnagit, angutillu pineqartut pingasut tamarmik, Pinerluttunik Isumaginnittoqarfimmit ukiuni marlunni nakkutigineqartussatut aalajangerneqarluni.
Nunatta Eqqartuussisuunerata, Søren Søndergaard Hansenip oqaatigaa, pineqaatissiinerup allanngortinneqarneranut tunngasumik oqaaseqarusunnani.
