Sooq Piinsisiortarpugut

- Piinsi tassaavoq Jiisusip Kristusip nunarsuarmi sulilini naammassillugu Ataataminut angerlareerneranik qilaliarluarnerata nalliussineqartarnera - tassa Anersaap Illernartup tikiuffia. Tassa annaassaanerup inuiassuarnut oqaluussissutigineqarnera tassanngaannit pilerfeqarpoq, Isak Davidsen nassuiaavoq.

Piinsi qanoq nalliussineqartarnersoq apeqqutigigatsigu Kujataata Provstia ima akivoq:

-Påskereerneraninngaaniit ullut 40-t qaangiunneranni Piinsi nalliussineqartarpoq - soorunalimi ukiut tamaasa nikeralaartuartarluni.

Piinsi freerfiinnartut isigisarianngilaq, tassami nalliuttorsuatsitulli allatut, Juullitut Påskitullu pingaaruteqartigaaq, tassami ilagiittut nalliuttorsuatta pingajuattut taaneqartarpoq. Taamaakkami ilagiinni kristumiuni kikkunniluunniit Piinsi tassaavoq inuiassuarni tamani nalliuttorsuaq angisooq - aamma Piinsi tassaavoq aasalerneranut aallarniutigisagarput, aasap nalunaaqutai Piinsiminngaanniit pisarpavut, Isak Davidsen oqarpoq.

Isak Davidsen aperaarput ukiuni makkunani naalagiarluartoqartarnersoq:

- Uanga nammineq palasitut oqaatigissavara Piinsip soqutigineqarnera Påskiminngaanniit Juulliminngaanniillu minnerusutut ilumut oqaatiginiarneqartartoq, kisianni soqutigineqarnera ukiuni kingullerni aamma alliartortoq malunnarpoq, Kujataata Provstia, Isak Davidsen naggasiivoq.