Sisoraaserluni ooqattaasarneq: Sondre Slettemark World Cupimi uniorani unammivoq, orlunerli nalituvoq

Unammineq pitsaasumik ingerlaleraluartoq Polenimi akunnittarfiup initaani eqqarsaatersorfigalugu kalaaleq sisoraaserluni ooqattaasartoq Sondre Slettemark issiavoq.
Nunarsuarmi kakkannerpaat unammineranni World Cupimi tallimanngormat unammeqataavoq Tysklandimi sisorartarfissuarmi Oberhofimi naatsumut 10 kilometerimut unammeqataalluni.
- Aallarnitsinni ilimagaara isiginnaartut 17.000-it missaanniittut. Misigisaq pikkunaqaaq, Sondre Slettemark KNR-mut oqaluttuarpoq.
Nunarsuarmi kakkannerpaat isiginnaartullu tusintilikkaat persuarsiorfiginagit Sondre Slettemark unammilluarpoq. Unamminermi quleriarluni seqqornermi peqataasunit 100-nit uniunngitsut aqqanillit akornanniippoq.
Sekundit nalituut
Suut tamarmik sisuuinnartutut misinnarseruttortut…
- Naluara World Cupimi peqataanikka kussunneqarsimanersut, Sondre Slettemark illariarluni kingumut qiviarpoq.
- Tassami juulli sioqqullugu Hochfilzenimi aamma taama pisoqarpoq. Maanna orluninni ajaappiara napivara sekundinik 20-nik annaasaqaatigisannik. Sekundillu taakku 20-rpiaat amigaatigaakka sukkanerit 60-it akornanniillunga malersuunnermut anngussinnaanissannut. Ingerlalluarnikkali iluaqutigilerumaarpakka, Sondre Slettemark oqarpoq.
Peqataasunit 100-nit normu 65-uvoq. Ajugaasoq tassaavoq Maillet Fillon Frankrigimeersoq aamma uniunngivilluni ingerlasoq.
Sondre Slettemark sisoraaserluni ooqattaasarnermi ukioq kingulleq inuusuttuaqqani unammeqataavoq taamalu unamminerit tulliuttut inuusuttuaqqani pisut peqataaffigissallugit. Sapaatip akunnerata naanerani tulliuttumi IBU junior Cup Polenimi peqataaffigissavaa.
- Ukioq kingulleq inuusuttuaqqaniippunga taamaattumik inuusuttuaqqani peqataanissara salliutippara isumaqarpungalu ajugaasuunissamut periarfissaqarlunga, Sondre Slettemark oqarpoq.
Polenimi unammeqataareeruni sapaatip akunnera tulleq Tysklandimi unammeqataassaaq.