Sofia Geisler Nikkulaammut tatiginninngilaq
Aalisarnermut naalakkersuisoq Nikkulaat Jeremiassen, imminnut assortuuttumik KNR-imut oqaaseqarpoq.
- Paragraf 37-imi akissuteqaatit aallaavigalugit kisitsisit toqqammavigalugit ilaatigut taamatut paasineqarsinnaasumik inissittoqarsinnaavoq kisianni taanna erseqqissassuara nammineerlunga oqarsimanngisaannarama aalisapiluttoqartoq, Nikkulaat Jeremiassen oqarpoq.
- Sisammangorneq 28/3: Inuit Ataqatigiit Naalakkersuisumut Nikkulaat Jeremiassenimut tatiginnikkunnaarnermik taasititsinissamik siunnersuuteqarput. Taanna aalisapiluttoqarneranik tusagassiorfinnut oqarsinnarluni politikerinut allatut nassuiaateqarsimanerarpaat.
Naalakkersuisup tatiginnikkunnaarnermik taasititsinissaq anigorpaa.
- Tallimanngorneq 29/3: Aalisarnermut, Piniarnermut Nunalerinermullu ataatsimiititaaq Naalakkersuisumik isornartorsiuilluni marlunnik tusagassiorfinnut nalunaaruteqarpoq ilaasortat ilaannit atsiukkanik. Nalunaaquttap akunnera ataaseq qaangiummat tusagaasiorfinnut nalunaarutit utertinneqarput allanillu taarserneqarput assinganik imalinnik, tamatumuunali ilaasortanit atsiorneqaratik.
- Ataasinngorneq 1/4: Aalisarneq pillugu ataatsimiititaliami siulittaasup, Henrik Fleischerip apersorneqarluni nassuerutigaa tusagassiorfinnut nalunaarutinut tunngatillugu kukkusimalluni. Ataatsimiititaliap Naalakkersuisumik isornartorsiuinini attatiinnarpaa, Naalakkersorlu tatiginerlugu isummernissaminnut akissuteqarnissaa utaqqillugu.
- Pingasunngorneq 3/4: Naalakkersuisup Nikkulaat Jeremiassenip KNR-imit apersorneqarluni oqaatigaa qaleralinnik aalisapiluttoqarnera §37 naapertorlugu akissuteqaammi oqaatigisimallugu, namminerli oqaatigisimanngisaannarlugu.
Taamatut oqaaseqarnera Inatsisartunut ilaasortamut paragraf 37-ilu atorlugu aalisapiluttoqarnersoq apeqquteqaateqartumut Sofia Geislerimut paatsiveerusimaarnerulersitsivoq.
- Uanga isumaqarpunga Nikkulaat Jeremiassenip oqaaseqarnera taavalu aamma Naalakkersuisut piujuaannartitsineq tunngavigalugu aqutsinerarlutik ingerlatsinermik tunngaveqarnerarlutik oqariartuutaat imminnut naapertuutinngitsut, Sofia Geisler oqarpoq.
Taanna naalakkersuisumut tatiginninnerulinngilaq, naalakkersuisormi tatiginassaguni naapertuuttunik oqaaseqartariaqartoq taanna isumaqarpoq.
- Tatiginninnera tamakkiisumik tunniutissagukku imaluunniit, oqaatigissagukku taava pissutsit oqaatigineqartullu imminnut naapertuuttariaqarsorivakka mannalu tikillugu takusinnaasakka naapertorlugit taamaattoqanngilaq, Sofia Geisler oqarpoq.
Taamaammallu Naalakkersuisup nassuiaanera Sofia Geislerimut paasisimasaqarnerulersitsinngilaq.
- Nikkulaat Jeremiassenip taamatut nassuiaanera apeqqutinik amerlanernik uannut pilersitsivoq, Sofia Geisler oqarpoq.
AAMMA ATUARUK Nikkulaat Jeremiassen isornartorsiuisoqarneranut akissuteqartoq
Inatsisartut Aalisarnermut ataatsimiititaliaat ullumi tallimanngornermi ataatsimiileruni naalakkersuisup isornartorsiorneqarnerminut nassuiaatai oqaluuserissagaat, ilaasortaq Karl Kristian Kruse ilisimatitsivoq.