Sociologi ulloq unnuarlu paaqqinnittarfiit pillugit: Suleqatigiilluarnerunissaq pisariaqarpoq
Meeraq ilaquttaminit sumiginnagaarujussuarsimavoq.
Kommunip isumaginnittoqarfiani sulisut tamanna paasimmassuk, meeraq angerlarsimaffiup avataanut inissillugulu ulloq unnuarlu paaqqinnittarfimmut inissigasuarneqarnissaanut innersuuppaat.
Kommuni oqartussanut tamanna pillugu qinnuteqarpoq, kisianni Namminersorlutik Oqartussat nalilersuisartoqatigiivi isumaqarput qinnuteqaataa naammaginnanngitsumik suliaasoq.
Qinnuteqaataa utertippaat, qinnuteqaallu taamaalilluni illuatungeriinnut uteqattaalersarpoq, tamannalu meeqqap atugarliornerulerneranik kinguneqartumik allamut inissinneqarnissaminut utaqqimaartuarsinnarpoq.
Qulaani oqaluttuaaraq isumaginnittoqarfiit assigiinngitsut meeqqanik inuusuttunillu ikiortarialinnik ikiuunnerminni suleqatigiinnerisa kipiluttunarsinnaasarneranut assersuutaavoq.
Akimmiffiit taakku, misissuisuunerup sociologillu Karen Margrethe Dahlip Danmarkip inuunermi atukkanik ilisimatusarfianeersup misissueqqissaarisarfianeersullu tassa Det Nationale Forsknings- og Analysecenter for Velfærdimeersup (VIVE), nunatsinni ulloq unnuarlu paaqqinnittarfiit pillugit qulaajaanermik nalunaarusiaminni saqqummiussaminnik misissuinermini arajutsisimanngilai.
Suleqatigiilluannginneq ajornarsiutaanerpaasut ilagaat, ilisimatuullu Naalakkersuisut tamatumanik qulaajaanissaannik kajumissaarpaat.
- Suleqatigiinnerit ilaasa ingerlarngi kipiluttunalaarput. Illuatungeriit isumaqarput, imminnut attaveqatigiinniartarnerat kipiluttunartarlunilu sullissinitik kinguaattorfiusartut, Karen Margrethe Dahl oqarpoq.
Suleqatigiilluannginnerat tusarnartaanngitsoq
Suleqatigiilluannginnerannut assersuutit nalunaarusiami imaaginnavipput.
Kommunit Ilaatigut iliuusissatut pilersaarusiorniaaruusaartartut, ulloq unnuarlu paaqqinnittaarfiit isumaqarput. Aamma ulloq unnuarlu paaqqinnittarfiit meeqqat ikiorneqarnissaannut pilersaarusiornernik kinguaattoortartut, kommunit aamma isumaqarput.
Nunatsinni kommunit meeqqamut inuusuttumulluunniit ataatsimut ulloq unnuarlu paaqqinnittarfimmut inissitamut 2018-imi aningaasartuutaat agguaqatigiisillugu ullormut unnuamullu 2.775 koruuniupput.
Tassa imaappoq, ukiumut 1 millionit koruunit sinnilaarlugit meeqqamut ataatsimut ulloq unnuarlu paaqqinnittarfimmut inissitamut aningaasartuutigineqartarput.
Tusarfik: VIVE
Ulloq unnuarlu paaqqinnittarfiit pingajorarterutaannaat kommunimik meeqqap ulluinnarni siunissamilu ingerlalluarnissaanut suleqateqarluarnerartut, immersuisitsinikkut misissuinermi erserpoq.
Isumaginnittoqarfiillu assigiinngitsut suleqatigiilluannginnerat meeqqamut kingunerluutaasinnaasoq, Meeqqat Illersuisuat MIO-meersoq Aviâja Egede Lynge oqarpoq.
- Namminersorlutik Oqartussat angerlarsimaffiup avataanut inissiinissamik nalilersuiniaaruusaartarnerat, kommunillu naammaginanngitsunik iliuusissatut pilersaarusiortarnerat ernumanarpoq.
- Meeqqat taakku immikkut illersorneqarnissaminnik pisinnaatitaaffeqarput, Aviâja Egede Lynge KNR-imut oqarpoq.
Suleqatigiilluannginnerat nalunaarusiami saqqummiussat naapertorlugit ukiorpassuarni atuuppoq.
Siuariartoqarsimasoq kommunit ilaat isumaqarput, kisianni ulloq unnuarlu paaqqinnittarfiit arlallit kommuninik suleqateqarniarnertik kipiluttunarnerarpaat.
Siusissukkut iliuuseqarneq
Suleqatigiinnerat ilaatigut sulianik nutaanik aallartitsisoqartarnissaata ingalanneratigut pitsanngorsarneqarsinnaavoq, Karen Margrethe Dahl nassuiaavoq.
- Ilaqutariit ilaat meeqqap angerlarsimaffiup avataanut inissinneqarneranik kinguneqartumik ajornartorsiulerpallaartinnagit ajornartorsiutaat siusissukkut qulaajarneqartaleraluarpata naapertuuttumillu ikiorneqartaleraluarpata sulianik nutaanik aallartitsisoqartarnissaa ingalanneqarsinnaavoq.
- Tamanna aningaasarpaalunnik soorunami naleqassaaq, angerlarsimaffiulli avataanut inissiinissaraluit pingasut ingalanneqarsinnaappata aningaasarpassuit sipaarneqartut kommunip pitsaaliunermut suliaanut atorneqarsinnaapput, Karen Margrethe Dahl oqarpoq.
Tamannarpiarlu pillugu, tassa ilaqutariit ataqatigiiginnarnissaannik meeqqallu angajoqqaaminnit qatanngutiminnit avissaartitaanissaasa ingalannissaannik iliuusissatut pilersaartut, isumaginninnermut naalakkersuisup Martha Abelsenip (S) erseqqissarpaa.
- Tassami ulloq unnuarlu paaqqinnittarfimmut inissiineq ikiuutini immaqa pitsaanerpaanngilaq. Meeqqammi angajoqqaavi qanigisaalu allat meeqqap pisariaqartitai aallaavigalugit ikorfartornerisigut meeraq ikioraanni immaqa pitsaanerpaavoq, Martha Abelsen oqarpoq.
Meeqqap ingerlalluarnissaanut pisariaqarluinnarpat angerlarsimaffiup avataanut inissinneqarnissaanik ukkassineq taamaatinneqarnavianngitsoq, naalakkersuisup Martha Abelsenip erseqqissarpaa. Oqartussallu suleqatigiinnerisa ingerlarngat qulaajarneqarumaartoq, taassuma aamma neriorsuutigaa.
- Qujanartumik suleqatigiittuaannarnikuupput. Toqqaannarnerusumik suleqatigiilluarnerusinnaanerisa oqariartuutigineqartoq tusaatissatut tiguarput. Suleqatigiinnerat pitsanngorsarneqassaaq, tamannalu maanna pilersaarusiatsinnut ilanngupparput, Martha Abelsen oqarpoq.
Martha Abelsenip oqarnera naapertorlugu nunatsinni kommunit suleqatigalugit ulloq unnuarlu paaqqinnittarfiit pillugit aasap ukiallu ingerlaneranni nutaamik pilersaarusiortoqassaaq.
