Socialdemokratineersoq: Puisit amiinik Kalaallit Nunaanneersunik pisigit

Folketingemi ilaasortaq socialdemokratineersoq nittartakkamut organictoday.dk-mut taama oqariartuuteqarluni allappoq.
aggustip 04-at 2014 10:03

- Pinngortitami pissuseqatigiinneq, nungusaataanngitsumik atuineq kalaallillu piniartut atugarisaat puisit amiinit sulianik pisiguit tapersersussavatit, Karin Gaardsted, socialdemokratineersoq, Nunat Avannarliit Siunnersuisoqatigiivisa Siulittaasoqarfianni ilaasortaq organictoday.dk-mut oqarpoq.

Tunngavissaqanngitsumik isumaqatissarsiornerit misigissutsinillu aallaaveqarluni EUmi inatsisiliornerit piniartut piniakkaminnik inuuniuteqarsinnaanerat sequmissimavaat. Oqaatigalugulu puisit Kalaallit Nunaanneersut qallunaat pulukiutaannit økologiskiusunit, pinngortitami pissuseqatigiinneq sianigalugit uumasuutigisanit, pitsaanermik uumasimasut.

AAMMA ATUARUK Puisit amiinik tunisassiat nutaat

- Puisit Kalaallit Nunaanneersut pisarineqannginnerminni pinngortitami akornusersorneqarani uumasarput, pisarineqaraangamillu nerineqartarput amiilu suliarineqarlutik atorneqarlutik. Puulukiititsinnit nersutaatitsinnillu pitsaanermik atugaqarluni uumasarpoq, allappoq.

Kalaallit naapertuilluanngitsumik pineqarput
Karin Gaardstedip EUp inatsisiliai naapertuilluanngitsuunerarpai erseqqissaassutigalugulu maanna pissutsit pisuullutik nioqqutissat pinngortitameersut pitsaasut maanngaannartinneqartartut kalaallillu innuttaasuinut naapertuilluanngitsuusut.

AAMMA ATUARUK Aleqa EU-mut puisitamiinik pilerisaarisoq

Puisit amii Kalaallit Nunaanneersut annoraaminernit allanit ullumi atugaasunit nungusaataanngitsumik pinngortitamullu ataqqinninnerusumik suliaasut, Gaardstenip tunngavilersuutigaa.

- Kalaallit ersoqatiginiartigit, danskinut kajumissaatigaara. Puisillu amiinit sulianik pisinikkut taamaaliorsinnaavugut, organictoday.dk-mut allappoq.