Aleqa EU-mut puisit amiinik pilerisaarisoq
Asuliunngitsunimmi eqqartuisoqarpoq. Ilasseqatigiissitsineq sioqqullugu Aleqa Hammondip EU-p avatangiisinut tunngatillugu kommissæria, Janez Potocnik, nalunaaquttap akunnerani ataatsimi ataatsimeeqatigaa. Ataatsimiinnermilu eqqartorneqartut tassaapput puisit amii aamma EU-p puisit amiinik eqqusseqqusinnginneranut atatillugu naggueqatigiit inuit ilaatinneqannginnerat pillugu WTO-p qanittukkut aalajangiisimanera.
Nalunaaquttap akunnera affaannaa ataatsimiittussaagaluarlutik ilivitsoq ataatsimeeqatigiipput.
- Tamanna isumalluarnartutut nalilerpara. Kommissærip sammisami matumani Nunatsinnik tusaaniarusussuseqarneranik ersersitsivoq, Aleqa Hammond oqarpoq.
Ajornartorsiutit 2009-imi aallaartipput. EU-parlamentimi puisit amiinik eqqusseqqusiunnaartoqarnissaa taamani aalajangiunneqarpoq. Danmarkilli Nunattalu sulissuteqarnerisigut, naggueqatigiit Inuit eqqusseqqusinnginnermut ilaatinneqannginnissaat iluatsinneqarpoq, tamatumalu malitsigisaanik kalaallit piniartut puisit amiinik EU-mut tunisaqaannarsinnaallutik. Taamatulli aaqqiissuteqartoqaraluartoq Nunatta puisit amiinik tunisartagai appariarujussuarput.
- Puisit amiinik eqqusseqqusinnginnermik aalajangiisimaneq EU-parlamentimut ilaasortanut sorujussuartut isikkoqanngikkaluartoq, inuiannut sakkortuupilussuarmik kinguneqartitsisinnaasoq kommissærimut erseqqissaatigaara, Naalakkersuisut siulittaasuat nassuiaavoq.
Nunarsuarmi niueqatigiit kattuffissuat WTO novembarip qaammataani aalajangerpoq naggueqatigiit Inuit ilaatinneqannginnissaanik aaqqissuussineq taamatut isikkoqartillugu inatsisinut naapertuutinngitsoq. Tamannalu puisinniat inuuniarnermikkut atugaasa ajorseriaqqinnerinik kultuurillu ulorianartorsiulerneranik kinguneqaratarsinnaalerpoq.
WTO-lli aalajangiisimanera EU-p qisuariarfigisariaqarpaa, taamaammat Aleqa Hammondip aamma neriuutigaa nutaamik aallartitsisoqarnissaanut periarfissamik tamanna ammaassisinnaassasoq.
- EU-p piujuaannartitsinissamik tunngaveqarluni politikkianut, nunarsuarmi nunat inuiinut tunngatillugu, immersueqataanissamut Nunatsinnut periarfissamik nutaamik ammaassisinnaavoq, Aleqa Hammond oqarpoq.
