Socialdemokraatit naalakkersuisoqatigisinnaanerat Løkkep ammaffigigaa

Statsministeriup Lars Løkke Rasmussenip atuakkami - "Befrielsens øjeblik"-imi ullumi saqqummersinneqartussami oqaatigaa Socialdemokraatit  Venstrellu naalakkersuisoqatigiissinnaanerat "siunnersuutitsialaasoq".

Partiit talerperliusut Folketingimut juunip tallimaani qinersinermi amerlanerussuteqassanngikkaluarpata partiit anginerit marluk naalakkersuisoqatigiilernissaat periarfissaanersoq atuakkiortup Kirsten Jacobsenip atuakkami apeqqutigaa.

AAMMA ATUARUK Folketingimut qinigassanngortittut 20-t

Partiit talerperliit qinersinerup kingorna amerlanerussuteqarunnaassagaluarpata taamaalisoqaratarsinnaasoq Løkke Rasmussenip nammineq oqaatigaa:

- Siunnersuutitsialaanera qularutiginngilluinarpara. Politikkikkummi sulinermi partiit talerperliit saamerliilu ilaatigut isumaqatigiissusiortarput, Lars Løkke Rasmussen oqarpoq.

Kina statsministerinngussanersoq partiit taakku marluk akornanni isumaqatigiinngissutaasariaqanngitsoq Rasmussen atuakkiami aamma oqarpoq.

Qinersisartunik isumasiunerup kingulliup takutippaa Socialdemokraatit maanna siuttuusut.

Løkkelli erseqqissaatigaa talerperliit naalakkersuisuutitaqalernissaat sallersaatillugu qinigassanngortilluni.

Partiinilli Stram Kursimit Nye Borgerligenillu tapersersorneqarnissartik pisariaqassappat isummani allanngortinniarpaa. Taamaattoqassappammi Socialdemokraatit suleqatigerusunneruai.

Socialdemokratimmi Venstrelu naalakkersuisoqatigiilissagaluarpata socialdemokratit siulittaasuata Mette Frederiksenip statsministerinngorsinnaanissaa Løkke Rasmussenip mattutinngilaa:

- Danmark pillugu aaqqissut pitsaanerpaaq anguniassagutsigu akornutaanianngilanga, Løkke atuakkiami oqarpoq.

Partiit saamerliunerpaat talerperliunerpaallu socialdemokratit Venstrellu naalakkersuisoqatigiiliornerisigut sunniuteqarunnaarsinneqarsinnaasut statsministerip oqaatigaa.

Socialdemokraatilli Venstrellu naalakkersuisoqatigiissinnaannnginerat Mette Frederiksenip DR-imut oqaatigaa.