FOLKETINGIMI Isumaginninnermut tunngasut danskit politikeriisa oqallisiginerugaat
Christiansborgimi Oqaluuserisassat Kalaallit Nunaannut tunngasut annertuut ukioq manna maannamut sammineqarsimapput. Danskit politikerii taama misigisimapput. Politikerilli Kalaallit Nunaat pillugu ataatsimiititaliami ilaasortaasunit arlalinnit eqqaamaneqartoq anneq tassa danskinit sunniuteqarfigineqarsinnaanngitsoq.
Folketingimi Nunarput pillugu ataatsimiititaliamut ukioq ulapaarfiusimavoq. Socialdemokratineersoq Karin Gaardsted 2011-mili ataatsimiititaliamiissimavoq.
- Kalaallit Nunaat pillugu ataatsimiititaliaq aatsaat taama ulapissimatigaaq. Folketingip inatsisit Kalaallit Nunaannut tunngasut arfineq marluk akuerisimavai, tusarniaanerit pingasut ingerlassimallugit, apeqquteqaatillu aallaavigalugit oqallittoqartarluni..
Karin Gaardstedimulli ataaseq pingaaruteqarsimavoq.
- Uranitalinnik avammut tuniniaanermut inatsit tunngasoq inissikkatsigu pingaarnerpaasoraara.
Enhedslistenimili Venstremilu oqaaseqartartut aamma taama isumaqarput, naak partiit taanna pillugu assigiinngitsunik isumaqarfigigaluarlugu.
Aamma atuaruk Kalaallit sunniuteqarniarnerat
Kalaallit Nunaannut tunngasut folketingimi sammineqarneranni ataaseq socialdemokratimut Karin Gaardstedimut puigunaassimavoq.
- Assut eqqarsaatigisarpara qanoq ililluta Kalaallit Nunaat ikiorsinnaaneripput meeqqat inuusuttullu amerlavallaat aarlerinartorsiortut ikiornissaannut.
Qaasuitsup kommuniani meeqqat pillugit nalunaarusiap isorinnittup januaarimi saqqummiunneqarnerata kingorna Folketingimi oqallinneqarsimaqaaq.
Naallu Kalaallit Nunaata isumaginninnermut tunngasut qangali tigoreeraluarai, nalunaarusiap danskit politikerii nikussaartippai - aamma Enhedslisstenimeersoq Christian Juhl.
- Suliassaq ilungersunartuugami, Danmarkimiit uagut tigussaasumik iliuuseqarfigisinnaanngisarput. Taamaakkaluartoq pisariaqartumik oqallippugut.
Dansk Folkepartiimi piumasarineqarpoq isumaginninnermut oqartussaaffiup Danmarkimiit tiguneqarnissaa. Tamannali Kalaallit Nunaanniit Folketingimilu amerlanerussuteqartunit itigartinneqarpoq.
Tamanna Søren Espersenimut assut attuisimavoq, allaat suliat allat Kalaallit Nunaannut tunngasut eqqartorusunnagit.
- Suliarinngittuukkavut eqqartorusunneruakka, tassalu kalaallit meerartarpassuisa sumiginnakkat atugaannik iluarsiinngittoorneq. Suliat ilaat nuannaarutigineriniit ugguaatigineruakka, DF-imeersoq oqarpoq.
Folketingi pisortatigoortumik oktobarip sisamaanni ataatsimeqqilissaaq. KNR-illi paasisai naapertorlugit aggustimi illersornissaq pillugu isumaqatigiinniartoqassaaq.
