Snowboardimik unammersuarneq iluatsilluarpoq

- Pitsaalluinnartumik unammisoqarpoq, Jens Olsen sisorartartut kattuffianneersoq oqarpoq.

Snowboardertarneq niviarsiaqqat akornanni soqutigineqaleriartortoq malunnartoq aamma oqaluttuaraa.

- Niviarsiaqqat arnallu unammersuarnermi peqataanerat nuannaarutissaavoq. Peqataasut marlussuit ajoqusernerat kisiat immikkut eqqaassanngikkaani, Jens Olsen oqarpoq.

SkierCrossimi unammersuarnermi Akannguaq Lennert ajugaavoq Malik Olsenilu tulliulluni, Jens-Jakob Lennert Sandgreen bronzennappoq.

BoarderCrossimi unammersuarnermi Rene Steenstrup ajugaavoq Sunavana F. Berthelsenimit Ado Møllerimillu malinneqarluni.

Snowboardertartuni Michael Damgaard 2009-mi ”Årets Rider”-isut toqqagaavoq. 93 pointinnakkami Kalaallit Nunaanni pissartanngorpoq Nukaaka F. Berthelsenimit Johannes B. Boassenimillu tullersorneqarluni.

Skiiernermi Emil Brandt Olsen tupaallatsitsinermigut Malik Berthelsen ajugaaffigaa. Bastian Nystrup nr. 3-nngorpoq.

Big Air-imik sapaammi unammisoqarpoq. Snowboard Big Air-imi Michael Dammgaard ajugaavoq. Sunavana F. Berthelsen tulliuvoq Johannes B. Boassenilu pingajuulluni.

Skiiernermi Malik Berthelsen pissartanngorpoq Emil. B. Olsenimit Lars Christian Heilmannimillu tullersorneqarluni.

BoarderCrosserluni arnani inersimasuni Nanna Lennert guldinnappoq, Arnaq B. Egede sølvinnattoq Mie Chemnitz brornzennappoq.

Slopestylemi Maria Grødem ajugaavoq, Julia Biilmann tulliusoq Arnaq B. Egede pingajuuvoq.

Big Air-ernermi Julie Biilmann guldinnattoq Nanna Lennert sølvinnappoq.

AWG-mi guldinnattoq, snowboardertartoq Mikkel Olsen, ajugaaniutivinnermi ajutoornermigut isikkami illuatungaa napivaa. Norgemi Hemsedalimi DM-imut sapaatit akunnerata tulliani pisussami taamaalilluni peqataanngitsuussaaq.