Snescooterit politiinik ulapisitsipput

Snescooterit inuusuttunit nuannarineqaqaat. Nuummi politiit inuusuttunik arlalinnik snescooterinik unnuami ingerlaarsimasunik sapaatip-akunnerani kingullermi ulapputeqarput, aallarussisimasunik aalakoorlunilu snecooterertumik.
Allattoq Najaaraq Egede
apriilip 11-at 2011 10:50

Nuummi politiit inuusuttut sisamat aallarussisimasutut unnerluussassanngortippaat.

Angutit inuusuttut taakku 15-iniit 18-inut ukiullit tallimanngornermi ualikkut politeeqarfiliaanneqarput, tassanilu tamarmik nassuerutigaat sisamanngornerup unnuaani snescooterinik aallarussisimanertik.

Inuusuttut sisamat taakku pineqaatissinneqarnissartik akiliisitaanissartilluunniit ilimagisinnaagaat, Nuummi politiit KNR-imut oqaluttuarput.

Aalakoorluni ingerlaartoq

Nuussuarmi angut snescooterertoq inunnik apuinngersaasoq arfininngormat ullaakkut nalunaarutigineqarpoq.

Politiit pisumik alakkarterinerminni angut nassaaraat unitsillugulu. Aavata qanoq aalakoornartoqartiginera paasiniarlugu misiliinermi politiit paasivaat angut 1,61-imik promilleqartoq. Aqqusinermi ingerlaarfimmi taama atsigisumik aamigut aalakoornartoqartigineq angallannermi inatsimmik unioqqutitsinerusarpoq.

Politiit angut 22-nik ukiulik tigusaraat eqqartuussivimmullu suliassanngortinneqarnerani, snescooterernermini niaquernaveeqquteqarsimannginnera ilanngullugu aamma misissugaanermini hashimik 2,5 grammimik kaasarfimmioqarnera unnerluussutaassapput.

Angut arfininngornermi kingusinnerusukkut iperagaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq