Timersorneq

VIDEO Assammik arsartartut ajorsaqqalaartut

Kalaallit Nunaanni Assammik Arsartartut Kattuffiat aamma Qallunaat Nunaanni Assammik Arsartartut Kattuffiat aaqqissueqatigillutik ikinngutigiittut ullut pingasut ingerlanerini unammisaqattaarnerit ippassaq aallartippaat, angutillu nunanut allanut unammisartut qallunaat unammisartui U21-t unammivaat, unammisullu naligiittorujussuusut Assammik Arsartartut Kattuaffiata oqaatigaa.

Allattoq Mads Lynge

juunip 12-at 2015 15:33

Unamminerup immikkoortua naammassimmat kalaallit 15-11-mik siuqqapput, unamminermilu 28-25-mik ajugaallutik.

Akutaaneq Kreutzmann unamminermi isertitsinerpaalluni arfineq-marlunnik isertitaqarpoq, Minik Dahl Høeghilu tulliulluni katillugit tallimanik isertitsilluni.

Danskit unammisartuini U21-ni isertitsinerpaasoq tassavoq jonas Tidemand pingasunik isertitsisoq.

Kalaallit nunanut allanut unammisartuini Akutaaneq Kreutzmann unamminermi unammilluarnerpaasutut toqqarneqarpoq, qallunaanilu Mike Jensen unammilluarnerpaasutut toqqarneqarluni.

Nuummi Illorsuarmi Timersortarfimmi tulliani aqagu arfininngornermi juunip ulluisa 13-ianni unammisoqassaaq, unamminerillu Inussivimmi sapaatiuppat juunip 14-iani naggaserneqassallutik.

Minik Dahl Høeghip unamminerup aallartinngitsiarnerani apersorneqarnera uani takuuk.

VIDEO Assammik arsartartut ajorsaqqalaartut

Aamma atuaruk