Small Time Giants crowd funding atorlugu aningaasanik katersisut
Saqqummersitassaaq taaguuteqassaaq Stethoscope, nipilersoqatigiillu pigisatik tamaasa akigalugit maannamut aningaasalersuisimapput. Akissarsiarisartakkatik tamaasa immiussinissamut atugassatut ileqqaarsimavaat. Taamaattoq suli 38.000 koruuninik amigaateqarput.
Tamannalu pissutigalugu nittartagaq Pledgemusic aqqutigalugu crowd funding atorlugu aningaasanik katersuinialerput. Saqqummersitassaat downloaditut imaluunniit cd-nngorlugu puisillu amianik poorlugu siumoortumik pisiarineqarsinnaavoq, aammattaaq nipilersoqatigiit ornigullutik imaluunniit Skypekkut tusarnaartitsisinnaapput.
- Qaqortumi aallartikkattali sungiusaannarata saqqummersitsinissarput takorluugariuarparput. Nipilertarnitsigut nuttarsimavugut, ataqatigiilluta inuunittalu sinnerani eqqaamasassatsinnik misigisaqarsimalluta. Nammineernissarput pingaartitariuarparput, aammalu aqqutissanik periarfissanillu nutaanik nassaarniartuartarluta. Maannalu tusarnaartartuvut nipilersornikkullu angalanitsinnik malittarinnittuvut ikiorsiullugit saqqummersitsilluta misilinnialerparput, nipilersoqatigiinni kitaarertuusoq Pilutannguaq Hammeken oqarpoq.
Aningaasat juulip qeqqa nallertinnagu katersorneqareertussaapput, septembarillu qiteqqunnerani saqqummersitsinissaq anguniagaalluni. Katersuiniarneq sapaatit-akunnerini marlunni ingerlareersoq aningaasat pisariaqartinneqartut 24 procentii katersorneqareersimapput.
Simon Lyngep saqqummersitami aappaa taamaaliornikkut aningaasalersorpaa. Kalaallillu nipilersortartut filmiliortartullu amerliartuinnartut crowd funding aamma atuleraluttuinnarpaat.