Slovakiami killilersuinerit coronamik tunillanneqarsimanngitsunut atuutissanngitsut
Slovakiami innuttaasut coronavirusimut misissortinnissaat Slovakiami naalakkersuisut ulluni qulingiluani kingullerni kaammattuutigaat.
Innuttaasut killilersuinerit assigiinngitsut atuutilersinneqannginnerini misissortinnissaat kaammattuutigineqarpoq.
Innuttaasut misissortissimasut coronavirusimillu tunillanneqarsimannginnermik uppernarsaasinnaasut killilersuinernut ilaatinneqassanngillat.
Innuttaasut tunillanneqarsimannginnermik uppernarsaasinnaanngitsut misissortikkusunngitsulluunniit suliartoqqusaassanngillat silameeqqusaassanatillunniit. Nutaarsiassaqartitsivik Reuters taama allappoq.
AAMMA ATUARUK Østrigimi killilersuinerit qaangerniarlugit inuppassuit coronavirusimut misissorneqassasut
Innuttaasut tunillanneqarsimannginnermik uppernarsaasinnaasut akerlianik suliartorsinnaatitaassallutillu silamiissinnaatitaassaapput, allakkerisarfiliarsinnaassapput, aningaaseriviliarsinnaassapput aamma errorsisarfinnut assigisaannullu ornigussinnaatitaassallutik.
Maleruaqqusat nutaat meeqqanut 15-iliineqanngitsunut utoqqalinersialinnullu atuutissanngillat.
Tunillanneqarsimannginnermik uppernarsaammik takutitsinissamut piumasaqaatit februaarip ulluisa aappaata tungaanut atuutissapput.
Misissuisarfiup tunillanneqarsimannginnermik inummut pineqartumut SMS-ikkut mailikkulluunniit allaganngorlugu ilisimatitsissutaa atorneqarsinnaasoq, Slovakiami nutaarsiassaqartitsivik Slovak Spectator allappoq.
Inuit 4260-it Slovakiami coronavirusimik toqquteqarsimasutut 240.000-ngajaallu tunillanneqarsimasutut nalunaarsorneqarsimasut, ilisimatusarfiup Johns Hopkins Universityp kisitsisaataani erserpoq.