Østrigimi killilersuinerit qaangerniarlugit inuppassuit coronavirusimut misissorneqassasut
Østrigimi innuttaasut akornanni amerlasuut coronavirusimut misissortinnissaat Østrigimi naalakkersuisut aalajangerpaat. Østrig sapaatit-akunnerata tulliani matussaaq, killilersuinerillu qaangerniarlugit innuttaasut misissorneqarnissaat aalajangerneqarpoq.
Østrigip kansleria Sebastian Kurz taama oqarpoq.
Nunami sanilerisami Slovakiami sapaatit-akunneri marluk matuma siornatigut taamaaliortoqarnera taassuma erseqqqissaatigaa. Slovakiamimi innuttaasut 67 procentiisa misssaat coronavirusimut taamanikkut sapaatit-akunnerata naanerani misissortipput.
- Østrigimi assingusumik iliuuseqarniarluta aalajangerpugut, Kurz, Østrigimi tv-qarfimmut ÖRF-imut oqarpoq.
AAMMA ATUARUK WHO: Europami coronaviruseqarlutik toqusut sapaatit akunnerata ingerlanerani amerleriapiloortut
Østrig marlunngornermit decembarip ulluisa arfernata tungaanut matoqqassasoq, Østrigip kansleriata arfininngormat nalunaarutigaa, coronavirusip siaruatsaaliornissaa anguniagaalluni.
Innuttaasut akornanni aalajangersimasut aallaqqaammut misissortissasut taassuma oqaatigaa, ilinniartitsisullu assersuutigalugit.
Innuttaasut akornanni allat kingorna misissortissinnaassasut ilaatigut aamma oqaatigaa, innuttaasut isumannaatsumik juullisiorsinnaaniassammata.
Innuttaasut akornanni amerlasuut coronavirusimut misissortinnissaannut pilersaarutit sapaatit-akunnerata tulliani saqqummiunneqarumaartut, kanslerip ilanngullugu oqaatigaa.