WHO: Europami coronaviruseqarlutik toqusut sapaatit akunnerata ingerlanerani amerleriapiloortut

Europami coronamik napparsimallutik ullormut toqusut 40 procentinik sapaatit akunnerata ingerlanerani amerleriarput.

Naalagaaffiit Peqatigiit peqqissuunissaq pillugu suleqatigiiffiat WHO tuluit nutaarsiassaqartitsiviannut BBC-mut taama ilisimatitsivoq.

Frankrigimi, Spaniami, Tuluit Nunaanni, Hollandimi Ruslandimilu tunillatsissimasut amerleriarnerpaasimasut, WHO-p oqaaseqartartua Margaret Harris oqarpoq.

- Napparsimmavinni peruluttut immikoortortaqarfiisa ulikkaaraluttuinnarnerat ernummatigineqarpoq, Margaret Harris marlunngornermi aarlerisaaraluni BBC naapertorlugu oqarpoq.

AAMMA ATUARUK USA-mi coronavirusimik tunillatsissimallutik napparsimmavinnut unittut imaaginnalertut

Ruslandimi ullup unnuallu ingerlanerinnaani toqusut aatsaat taama amerlatigipput. 320-t toqupput, Ruslandimi coronamut attuumassutilimmik toqquteqartut taamaalillutik 26.589-nngorlutik.

Italiamilu coronamik napparsimallutik toqusut nalunaaquttap akunneri 24-t ingerlaneranni aamma amerleriarujussuarput, tassami inuit 221-t toqusimagamik.

Østrigimilu coronamik napparsimallutik toqusut 1000-nit amerlanerulersimapput.