Slettemark uniunngitsooqqippoq, OL-imili peqataajunnaarluni

Ukaleq Slettemark OL-mi peqataanermini sisoraatinik sukkasuumik ujakkaarluni arpannermi 7,5 kilometeri ingerlaffigaa. 

Ukaleq ingerlalluarsimaqaaq, ullumilu ooqattaasakkani tamakkerlugit eqqorluarpai.

Medaljemilli pissarsinissaminut ajoraluartumik sisoraatinik ingerlanermini sukkassusaa tamakkiilluarsimanngilaq. Unalu sukkasuumik arpanneq Ukaleq Slettemarkip anngunnissamut periarfissarigaluarpaa. Unamminermi uani iluatsitsinissamut pikkorinnerpaat 60-it akornanniinnissaq pisariaqarpoq, Ukaleq Slettemarkili 65-inngorpoq.

Eqqoriaanerni 30-ni 30-t eqqorai

Ukaleq Slettemark 22 sekundimik sukkanerulaarsimasuuguni pikkorinnerpaat 60-it akornanniinnissamik qulakkeerisimassagaluarpoq. Taamaakkarluartorli unamminermi angusani ilorrisimaarutigai.

- Angusara naammagisimaarluarpara, ooqattaasagassakka eqqorluarpakka, misigisimavungalu siuliinut naleqqiullugu 100-riaammik pitsaanerullunga, ajoraluartumik tulleriiaarluni aallarluni unamminermi pitsaanerusinnaagaluarpoq, allatulli iliorsinnaasimanngilanga, Ukaleq Slettemark TV Sportenimut oqarpoq.

Taamaalillunilu OL-imi peqataanermini eqqoriarnerni 30-ni 30-t eqqorpai.

AAMMA ATUARUK Aqagu unammeqqissasoq: Ukaleq Slettemark OL-imi aappassaanik unammilersoq

- Naammagittaalliutigisinnaanngilara. Ooqattaanissamut piareersarluarnikuuvunga, sungiusarneralu tamaat ooqattaaneq sulissutigingaatsiarlugu, tassa inissisimasarnera aallaasinniittullu allanngortinnikuuakka. Tamanna angusaqarfiuvoq, sisoraaserluni ooqattaasartoq oqarpoq.

Taassuma angusai kisitsisitigut timersornermi pikkorinnerpaat ilaannit pitsaanerupput. Taakkuli Slettemarkimit sukkanerungaatsiarput.

Ajugaasumit 3 minutsinik arriinnerusoq

Ukaleq Slettemarkip 7,5 kilometerimi sukkaniunnermi ooqattaanernilu marlunni minutsit 23-t 54,6 sekundillu katillugit atorpai. Taassuma sukkassusaa norgemiumit ajugaasumit, Marte Røiselandimit 3 minutsit sinnerlugit arriinneruvoq.

Slettemark ullumi anngussimagaluaruni sapaatiuppat malersuunnissami peqataasagaluarpoq, tassanilu OL-imi peqataanera naggaserluni. Sisoraaserlunimi ooqattaasartoq inuusuttut nunarsuarmi pissartanngorniunneranni peqataasussaavoq, taamaammat Beijingimi februaarip ulluisa 19-ianni sukkaniunnermut peqataanissamut allatsissimanngilaq.

Kalaallilli sisoraaserluni ooqattaasartup ullumikkut 65-itut inissinnera OL-imi peqataaneranut uniffiliivoq.