Slettemark sisorarluni ooqattaasarluni VM-imut piariilerpoq

Sisorarluni ooqattaasartartoq misilittagartooq Øystein Slettemark, sisorarluni ooqattaasarluni nunarsuarmi pissartanngorniuunnissamut piariilerpoq. Nunarsuarmi pissartanngorniuuttoqannginnerani unamminerit kingullersaat sapaatip akunnerata naanerani ingerlappaa, Slettemarkip sisorarnini naammagisimaarpaa, ooqattaasarninili naammaginagu.
Allattoq Peter Troelsen, Simon Uldum
februaarip 04-at 2013 07:08

Øystein Slettemark ulluni tallimani Italiami Martellimi, meterinik 1700-nik portutigisumeereerluni 10 km-inut sukkaniuteqataavoq. Peqataasunit 121-iusunit nr. 86-iulluni apuuppoq. Slettemark ajugaasumit Erlend Bjøtnegaardimit Norgemeersumit min. 5:33 kigaanneruvoq.

Taakkunannga minutsit pingasut Øystein Slettemarkip ooqattaasarnerminik ajornartorsiuteqarneranik pissuteqarput. Øystein Slettemark ooqattaasarnermini unioqattaarnini pissutigalugu pillaatitut arfinileriarluni kaajallaasariaqarsimavoq. Ingerlaarnermi piffissaq atorneqartoq kisiat isiginiaraanni , sisorartut sukkanersaat Christoph Stephen Tysklandimeersoq min. 2.33-narnik inorpaa.

Øystein Slettemark ingerlaarnermini timiminik ajornartorsiorpoq, nunarsuarmili pissartanngorniuunnissamut taama qanitsigitillugu tamanna pissutigalugu unamminermi ingerlaannartariaqarsimavoq. Slettemark sisorartuunermini sivisoorsuarmi pingasoriaannarluni unamminerminik unitsitsisariaqarsimavoq, taamaaliortariaqarneranullu ajoqusersimanera pissutaasarsimalluni.

Øystein Slettemark sisorarluni ooqattaasarluni nunarsuarmi pissartanngorniuunnermi sukkaniuunnermuinnaq peqataaniarpoq, tamannalu arfininngornermi februaarip qulingiluaani pissaaq. Nunarsuarmi pissartanngorniuunnerit Tjekkiami Nove Mestomi ingerlanneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq