Inissiamik attartortoq pakatsisoq: Inissiat akisunerulernissaat akuerineqarsinnaanngilaq
- Huslejet akisoreertigisut aamma qaavatigut akitsuisoqaqqinniarpat soorlulusooq pillarneqartugut.
Nuummi blok 6-imi Naalakkersuisut ineqarnermut akitsuiffiginiagaanni najugalik Asta Høy oqarpoq. Taassuma inissiamut januaarip aallaqqaataaniit akisunerusumik akiliisalernissani qilanaarinngilaa.
Taassuma inissiamut aserfallatsaaliuinermi ajornartorsiuteqangaatsiartumut akitsuinissaq akuersaarneqarsinnaannginnerarpaa.
- Blokkit sananeqaqqaarmatali igalaat suli taakkuupput ullumikkut 2021-mi taakku ima ussiitsigipput ukiaraangat igalaat sinaat vatsinik milissortarpagut, suerlu isaasarmat isersimateqartuaannartariaqartarpugut, Asta Høy oqaluttuarpoq.
Nangilluni oqaluttuarpoq igaffimmi supoortumik peqaratik, pilersinniarlugulu qinnuteqartaraluarluni akineqarneq ajorluni unnerpaa.
- Igaffimmi skaaviit amigarput, anartarfik uffarfillu ataatsimoormata matu aalamik aannikuuvoq, pequusiveqanngimmallu qerititsiviit manisallu sinittarfimmiitittariaqartarpagut.
Taanna nassuiaavoq 2014-mili iniminnut nuukkamik manna tikillugu aaqqitassat aaqqinneqarsimanngitsut naak naammagittaalliutit arlalissuit nassiuttaraluarini.
Attartortut akiliinerussasut
Naalakkersuisut Namminersorlutik Oqartussat inissiaqarfiini 16-ini attartornermut inatsimmik malinninnissaq pissutigalugu ineqarnermut akiliut qaffanneqassasoq paasissutissiissutigaat.
Taamaammat najugaqarfiutinit arfineq marlunni amigartoorutit 4,9 millionit koruuniusut attartortunit naligiissarneqassapput. Aningaasat inissianut pinasuartumik iluarsartuunneqartussanut akiliutigineqassapput. Ineqarnermut naalakkersuisoq, Naaja H. Nathanielsen oqarpoq.
Ineqarnermut akiliut qaffanneqassanngippat iluarsartuussinerit kimik akilerneqassasut isumaqarpit?
- Tamanna akiuminaappoq. Inuiaqatigiilli tamatumani akiliisanngitsut isumaqarpunga. Ingasappallaaqaaq, Asta Høy oqarpoq.
Inissiat katillugit 2.877-it akii inissianut akinik qaffaanermi eqqugaassapput.
Asta akerliussutsimik takutitsisoqarnissaanik kaammattuuteqartoq
Ineqarnermut akiliut qaffanneqarnerat aningaasaqarnikkut ilungersuareersunut sunniuteqarnerlussinnaanissaa Asta Høyip ernumassutigaa.
- Tamanna inunnut allanut immaqa aningaasarsiaqarpallaanngitsunut aamma eqquissaaq. Tamanna akuersaarneqarsinnaanngilaq. Inissiarpassuaqarpoq inissiatut nutaatulli pitsaatiginngitsunik, Asta Høy oqarpoq.
Inissianut attartornermut akiliutit qaffaavigineqarnissaata ilorrisimaarutiginninnera pillugu politikerinut suaartarniarsariniarpit?
- Aap, inuit katersuullutik inissiat akitsornissaannik isumaqataannginnitsinnik takutitsinissaat kissaatigaara. Akerliussutsimik takutitsilluta oqarsinnaavugut: "Naammaleqaaq".
Inissiat katillugit 2.877-iusut januaarip aallaqqaataanit akitsussapput. Najugaqarfiit 2022-mi januaarip aallaqqaataanit akitsuiffiusussat uani takusinnaavatit:
