Skotlandimi qinersineq namminiilivikkusuttunut aalajangiisuussasoq
Skotlandimiut inatsisartunut ullumikkut sisamanngornermi qinersipput, tamannalu Tuluit Nunaanut atasoqaanassanersoq aalajangiisuussaaq.
Partii Skotlands Nationalparti, SNP, Skotlandip 2023-mi namminiilivinnissamut innuttaasut taasitineqarnissaat pillugu qineqqusaarput, kisianni Tuluit ministeriunerata Boris Johnsonip Skotlandimiut namminiilivinissamik taasisitsiniarnerat akuerisinnaanagu arlaleriarlugu oqaatigaa.
Tamannalu partiip SNP-ip siulittaasuata Nicola Sturgeonip akuerisinnaanngilaa.
AAMMA ATUARUK Skotlandimiut namminiilivinnissamik oqariartuuteqartumik qinersilersut
Qinersisartut amerlanerussuteqartut partiip SNP-ip piumasaqaataa tapersersorpassuk, innuttaasut taasitinneqarnissaannut itigartitsinissaminut tamat oqartussaaqataanerannik ileqqorissaarnissamulluunnit ministeriuneq Boris Johnson tunngavissaqanngitsoq, Nicola Sturgeon siusinnerusukkut oqarpoq.
Skotlandimiut namminiilivinnissaat pillugu innuttaasut taasitinneqarnissaat Tuluit Nunaanni naalakkersuisunit 2014-mi akuerineqarpoq.
Skotlandip ukiut 300-it sinnerlugit Tuluit Nunaannut atanera qinersisartut amerlanerussuteqartut tapersersorlugu, Skotlandip namminiilivinissaanut naaggaarput, taannali suli assortuussutaaqaaq.
Tuluit Nunaatali EU-mit aniniarluni 2016-mi innuttaasunik taasititsisoqareersoq pissutsit allanngortut, Sturgeon partiialu SNP oqarput.