Skotlandimiut namminiilivinnissamik oqariartuuteqartumik qinersilersut
Skotlandimiuunerminnik pingaartitsisut inatsisartunut sisamanngornermi qinersinermi ajugaasangatinneqanngillat, tamannalu Skotlandip namminiilivinnissaanut innutaasunik taasisitsinissamut suliniummut annikillisitsisinnaalluni, nutaarsiassaqartitsivik Reuters taama allappoq.
Aviisip The Scotsmanip qinersisartunik isumasiusitsinerani, Skotlandimiuunermik pingaartitsisut partiiat, Skotlands Nationalparti (SNP), inatsisartuni amerlanerussuteqarnissamut inissanik arfinilinnik amigaateqarpoq.
SNP-ip siulittaasuata Nicola Sturgeonip qineqqusaarnermi Skotlandip namminersulivinnissaannut 2023-mi innutaasunik taasisitsinissaq qineqqusaaarutigaa.
AAMMA ATUARUK Skotlandip namminiilivilernissaa tapersersorneqarluartoq
Qinersisartut amerlanerussuteqartut partiip SNP-ip piumasaqaataa tapersersorpassuk, innuttaasut taasitinneqarnissaannut itigartitsinissaminut tamat oqartussaaqataanerannik ileqqorissaarnissamulluunnit ministeriuneq Boris Johnson tunngavissaqanngitsoq, Sturgeon oqarpoq.
Skotlandip namminersulivinnissaannut Skotlandimiut taasitinneqaqqinnissaannut Tuluit Nunaanni eqqartuussiviit kisimik unitsitsiinnaasut, Sturgeonip tuluit ministeriunerannut marlunngornermi nalunaarutgiaa,
- Erseqqissaassutigissavara innutaasunik taasisitsinissaq Boris Johnsonip unitsinniarpagu, eqqartuussiviit aqqutigisariaqarpai, Sturgeon oqarpoq.
AAMMA ATUARUK Johnsonip skotlandimiut namminersulivinnissaannut taasititsisoqaqqinnissaanik piumasaqaat itigartikkaa
Skotland Tuluit Nunaannit avissaarluni namminersulivinniissaa pillugu Skotlandimiut 2014-mi taasitinneqarput.
Skotlandimiut 55 procentii Tuluit Nunaannut ataannarniarlutik taasipput.
Sturgeon taassumalu partiia isumaqarput, pissutsit maannakkut allanngorluinnarsimasut.
2014-mi Skotlandimiut taasitinneqarmata Tuluit Nunaat suli EU-mut suli ilaasortaaginnarnissaa naatsorsuutigineqarpoq.
Tuluit Nunaannili 2014-mi innuttaasut taasitinneqarmata, amerlanerussuteqartut EU-mit ilaasortaajunnaarnissaq piumasaraat.